au coin del rue sur google maps

j' su such' trottoir in face del rue Leverrier, à gauche ch' est l' mason du qu' mes parints i zy étotent près de 60 ans ....

j a su y a pas longtimps que ché derniers gins que j a pu connaite quand que j éto jone, sont toutes décédées

faut dire aussi , que par le fait du hasard aussi , ché gins que j avo connus, la plupart i y zy étotent arrivés au cours de la même décennie entre 1940 et 1950.....

là j a mis eune vue aérienne , in vo que chéto plutôt eune rue à l écart, avec quequ' groupes d masons , à la lisière même des champs agricoles et des pâtures....

un cul d' sac, avec de ch' fait là, pas grinmint d' passaches, à part ché gins d' la rue......

cha s intindo bin entre ché gins, cha discuto sur ché trottoirs , ou au niveau d' ché portes à deux battants , (souvint ché garnoules intre elles) ...

et ché zhommes i discutotent souvint intre eux par l arrière, par ché gardins qui étotent leur domaine ....

même en ravisant que par in haut , in vo que cha a bin cangé, suffit d ailleurs d'les raviser ché fameux gardins ...

in auro fait chte genre de photos rin que dans les années 70, in verro pas comme asteure des grandes bandes vertes derrière cha masons signe que ch' est pu que d' l herpe asteure ...

in auro vu des routes d' légumes, des ch'mins rectilines qui séparotent in deux ché gardins sur toute la longueur .....

su la gauche y a eune cité pavillonaire, du que chéto not' terrain de jeux , eune grante pâture inexploitée, pi un grand terrain agricole qui déchindo jusqu à la rue verte à la limite d' Haillicourt ..

finis ché garaches qui étotent au bout d' la rue su la gauche, finis aussi tous ché gardins qui y avo au bout d' la rue , du que j avo ker apporter sin gouter à min père, quand qui li travaillo .....

j a ravisé "m'mason" , tout parel , ch' grand sapin qui éto là depuis 1973 y a été abattu, et ch' gardin parel, ch'est devenu de l herbe ...

d ailleurs si in "survole" Bruay d un peu plus haut, t in vo pu grinmint d' gardins qui sont cor exploités ..

après j peux pas m' plainte, j' peux cor artrouver en gros la rue que j a connu plus jone ....

mais chti qui a habité rue de Divion in haut de la rue de la république, bin si i ravisse Google maps, y a intérêt à avoir d' l' imagination , tout y a été abattu ....

eune page se tourne