tomates du maroc 1 roro 29 le kilo en février

taleure j a été à mon lideule, et quo que j' vo such' podium à l'entrée ?

"tomates du Maroc, 1 euro 29 le kilo"

des tomates au mois d' février ..................

zinquietez pas Monsieur Leroy, j' les za pas acatées ....

nan nan, j' auro pas pu passer en caisse, pasque j' su sur que d' là haut vous m auriez j'té un regard désaprobateur .....

Monsieur Leroy, chéto un commerçant d avant garte, au début des années 70, y a profité d' eune boulangerie qu ale fermo rue Anatole France (pour ceusses du coin, celle ouverte par Monsieur Bouton, à coté d' celle des soeurs Balavoine) et qui avo freumée rapid'mint

avant Monsieur Leroy i teno un tchiot magasin rue Florent Evrard, pas loin d' la belle au bois ......

m' mère ale i yallo djà, vu que ché légueumes et ché fruits chéto vraimint que d' la qualité ....

i s a donc installé rue Anatole France, comme j' viens d'dire chéto que des légueumes et des fruits de qualité , et savez i les metto vraimint en valeur

j' sais pas si yavo fait des écoles d' étalagistes, in tout cas, y a des coups j' m arreto d'vant s' vitrine ,pour vire sin ordonnancement impécape ...

rin à vire avec ché cageots mis à la vite à mon d'chez NEN , un peu plus loin

à l intérieur i avo meme installé eune carette à bras, du qu' dins i metto ché produits de primeurs

j' vous parle d un temps pas si loin qu' cha, eune cinquantaine d années au plus, du que , yavo des saisons ...

à telle périote chéto la saison des prunes, à eune aute,ché quériches, à eune autes , ché tomates ........

chéto avant qu in fasse d' la culture industrielle dins ché pays limitrophe, qu in mette in plache eune logistique qui permette d amener tout au long d' l année ché fruits et légueumes dins ché zétalaches ...

j' me souviens un coup y a eune dame qu ale a li a d'mindé un fruit , du ginre des fraisses ou des mandarines ,j' sais vraimint pu

ale s étonno que Monsieur Leroy i en fasse pas, là cha l' avo énervé ....

"y a des saisons à respecter Madame " qui y a dit du bout des levres ...

et l' femme ale avo infoncé l' clou en dijant qu ale in avo vu ailleurs

"bin allez z'zacater ailleurs Madame " qui ya dit , tout aussi énervé

ch'éto un commerçant qui respecto les produits qui vindo, chéto pour li aussi , respecter ché clients

pi Carrefour y a arrivé ,sur qui a perdu du chiffre d affaires, mais dins la rue commerçante , ché cor li, avec la boulangerie de Madame Maréchal, qui a l' miu tenu l' coup ....

j' l a arvu bin d' zannées après, i éto à la retraite, j éto étonné pasqu i a été m arquerre dins zin buffet toute eune série d' photos qui avo pris d' ses étalages .......

in pourro dire que ch'est un temps passé, cor que , in vo par chi par là, avec l avenement du bio, plein d' magasins qui vintent des produits d eune meilleure qualité qu in pourro trouver en grante surface

Monsieur Leroy, zétiez trop en avance sur vot' temps ....