ch' calendrier de la poste partie 2

faut pas croire que ch' facteur i avo pu s' tiete quand meme , i savo c' que les gins i préférotent comme calendrier ....

j' arvo m' mère, qui li dijo tout d' suite avant qui ouvre s' bouque , qu ale voulo un calendrier avec des cats ou avec des paysaches d' montane , cha dépindo des années ...

ah maman ...té savo pas camucher tes sentimints, mais ch'est tout à ton honneur...

tro quat' secontes pour choisir sin calendrier, ch' billet y éto djà pret dans l' niche du buffet

m' mère ale li donno, et après ale sifflo, enfin ale essayo, mais cha voulo dire "cal'tez vollaille" .....

sauf qu un coup min père i éto arrivé inter temps et qui commincho à discuter avec ch' facteur et que m' mère ale faijo des gros ziux ....

et pendant ch' temps là in s intindo pu dins l' mason, vu que ch'tchien i arréto pas d' aboyer .....

cha y est ch' facteur i éto arparti, et j' preno possession du calendrier ...


un rapite coup d eule su ché photos, et après , j' raviso ché pages intérieures .....

j avo ker raviser la page centrale, savez , celle que d' sur yavo la carte complete du pas de calais, avec toutes ché communes écrite in tout pitit ....

j' cacho bruay, et tout d'suite j' raviso le ch'min qui nous meno jusqu à merlimont ...

ch' départemint du pas de calais, not' départemint , bien en grand , qui prenno toute l' page ...

in périphérique, en plus foncé, sans grinmint d' précisions à part des grantes villes , le département du nord, au nord.....

et au sute ch'ti de la somme ....

pour mi qui avo eune dizaine d années, ch'éto djà pu not' quartier ......

après j' raviso les plans des villes principales, enfin le plan de la ville principale à mes ziux, Bruay les berdoules .........

j éto aussi assez prévoyant , cha faijo rire m' mère , j' raviso les horaires de marée pour l été à merlimont ......

"bon t as fini" qu ale dijo m'mère au bout d un momint, que jel' range avant qui s abime ....

savez le premier janvier, j éto pas ch' dernier pour dire am' mère d' canger ch' calendrier...

cha m' permetto surtout de récupérer l ancien...

comme cha j' m amuso après à inventer des attaques , des invasions du pas de calais par ché boches mais que d' l' aute coté yavo ché zalliés qui en fin d' compte allotent gagner ....

(j a mis ché "boches" pasqu in éto pas cor très loin de la fin de la guerre, et que che so par le ressenti des gins qui avotent connu ch' t époque, ou par tous ché flimes d'guerre, ché méchants chéto les "boches" )