ANNIVERSAIRE
par berlens78 le, 21/11/2019Cha y est ! Cha fait un an que j’ publie des zartiques sur HdC ; y a un an comme aujourd’hui, j’invoyos min premier artique à Marie-Claire, « les chrysanthèmes » (http://www.histoires-de-chtis.com/index-news-28128-chrysanthemes.php), in m’escusant d’écrire in français, qu’ jé n’savos pas écrire in patois …
Ben ouais, jé n’savos pas que j’ savos écrire in patois ; j’étos comme monsieur Jourdain qui pinsot pas qui savot faire délle prose.
Alors pour ch’ deuxiinme artique, j’ai essayé, jé m’ sus lancé, et chés mots i sont vénus tout seux ; comme quand in t’ jette à l’iau et qu’ té t’ rinds compte que té savos nager. Bon, parler patois, j’y arrivos ; mais pour l’écrire , commint qu’in fait ? Du qu’y sont chés règles ? Y a pas un genre éd’ Bled in patois pour cha ?
Ben nan, bébête, in patois justemint, y’a pas d’ règles ! té sais pas cha ? Parler, écrire in patois, ché la liberté totale ; té parles comme té veux ; et té l’écris comme té veux aussi ; tout l’ monde y fait comme i veut et tout l’ monde i s’ comprind ! Qui qui dit miux ?
Ah bon ; ben alors j’ vas essayer d’ l’ écrire phonétiquemint, comme cha vient dins m’ caboche. Bon i faut jusse armette à s’ plache l’ordinateur qui crot qu’in fait des fautes à chaque mot, i fermer s’ guiffe pour du bon, et ch’est parti ! cha y est, in est in pleine mer ! pus personne pour m’imbéter ! Y’ a ch’ vint qui souffe dins chés voiles, ch’ batiau qui vogue tout seux ; j’intinds pus chés mouettes, jé n’sais pas du que j’ vas, alors j’ ferme mes ziux et jé m’ laiche aller …
Et chés zimages i défilent, et tous chés souvenirs avec, chés parfums, chés zodeurs, chés éclats d’ rire, chés grands bonheurs pis chés pétits malheurs … Em’ main alle queurt tout seul su’ ch’ clavier, chés mots i défilent tout seux à l’écran ; et mi j’ sus là, à rien faire, comme un gros fainéant , qu’ jé qu’ à lire chés zhistoires qui s’ écrivent là comme cha devant mi …
J’ voudros armercier surtout Minloute, qui m’a montré ch’ quémin à prinde, avec tous ses histoires qu’ i a raconté sur HdC d’pis pus d’ 15 ans ; pis tous ché zautes marins qui m’ont tracé l’ route à suiffe, comme Loumarcel , JPP, Nounours, Boxerman et eune pinsée émue pou ch’ malheureux Nounours qu’y a laiché là s’ galère pis ses rames y’ a seulemint quéques jours… Et enfin Marie-Claire qui est toudis là, fidèle au posse, et qui vèlle au grain. Et minme si in l’ vot pas gramint, qu’ alle s’ met jamais in avant, heureusemint qu’alle est là pour armette du carbon dins l’ salle des machines quand y’ a pus d’ vint …
Alors voilà, mi cha m’ plaît, j’ sus vraimint contint d’avoir trouvé un coin comme cha sur Internet, qu’in peut vénir à toute heure, s’ assir dins un coin, mette ses pieds devant ch’ fu, et acouter des zhistoires d’avant, des zhistoires ed’ jeaunnes, des zhistoires dé m’ n’ éfanche et d’ min pays, des zhistoires de chtis finalemint.
D’pis un an jé n’ai fait des miles et des miles ; jé n’ai croisé des îlots déserts et j’ai z’ai minme compté : 67 au total. J’espère core in rincontrer gramint avant d’artoucher terre ; j’ sus pas préssé d’ rintrer à bon port passe que jé n’ sais toudis pas jusque du que j’ veux aller. Alors j’ continue à mé l’ couler douche, allongé comme un viau sur min transat , à raviser la mer, chés nuaches, chés îlots qui défilent ; min batiau i file drot devant et y’a pas d’ terre à l’ horizon.