MARCHAND DE VELOS
par berlens78 le, 10/12/2019Après Crendal, in armontant su l’ fosse 4, in trouvot un marchand d’vélos (Carlier ou Leblanc ?) qui s’a mis après à vinde des mobylettes, qu’ chétot plus rintabe passe que chés jeaunnes i comminchotent à ête mates ou bien qu’ chés côtes à monter alles zétotent devenues pus raides. I y’est cor asteure, d’ailleurs, après avoir dû canger au moins dix fos d’ propriétaire ; mais y’a longtemps qu’i n’y a pus d’vélos, i’ reste pus qu’ des scooters… I étot bien fait ch’ magasin là passe qu’y avot un passache su’ l’ côté qu’in arrivot directemint dins l’atelier sans traverser ch’ magasin. (vire photos 2001 et 2018)
Un magasin d’vélos à côté dé m’maison, chétot aussi un sacré coup d’ chance passe que j’avos récupéré à min frère sin viux randonneur « Tournois », que j’passos souvint l’début des vacances à astiquer pis à faire des réglaches ; mais j’n’arrivos jamais à régler ch’dérailleur, ou bien chés jux d’pédaliers et d’direction, que j’démontos pour les nettoyer et chés billes éd’ chés roulemints i roulottent tout partout dins l’cour qu’ j’avos bien des ruses à les artrouver. Min père i m’ donnot jamais un coup d’ main pour cha, j’avos qu’à apprinde à m’ démerder tout seux. Mais j’y arrivos pas, chétot trop compliqué, y’ avot pas d’ lives du genre « Intretenir sin vélo pour chés nuls » pis cor moins Internet pour cacher des vidéos ; alors à chaque fos j’arrivos tête basse à ch’ marchand avec min vélo et chés pièches détachées dins un sac pour li d’mander dé l’réparer ou d’ faire chés réglaches li-minme …
Mais i faijot pas cha pour rien et min « budget » vacances, qu’ chétot chés sous qu’ j’avos mis d’côté tout l’année d’pis chés étrennes, i prénot déjà un coup dins l’aile … Comme j’étos toudis préssé d’ l’avoir, passe que j’ dépavos d’aller déchinde élle côte d’Houdain à toute blinte, jé l’supplios presque dé l’faire tout d’suite ; j’y ai minme proposé eune fos d’ li payer l’double pou m’ l’arringer tout de suite… mais i’avot gramint d’ traval et chétot pas toudis possibe ; enfin, i’ étot arringeabe et i faijot d’ sin mieux pou m’ faire plaisir… Mais sans preinde des sous in plus, i’ aurot jamais volé un jeaunne…
Chétot un mécanicien honnête, qui faijot d’ sin miux mais qui roulot pas sur l’or pour autant ; i gagnot minme pas assez pour s’acater eune auto ; et souvint, in passant au soir devant sin magasin qui étot fermé, in l’intindot qui travaillot cor dins sin atelier.
Plus tard cha s’a compliqué passe que mes parints i m’avotent donné des sous pour min bac éd français pour aller acater un vélo ; l’ première fos qu’ j’allos avoir un vrai vélo tout neuf pour mi tout seu. Cheux dé ch’marchand à côté, i m’plaisotent pas trop passe que jé n’avos vu un biau amont Tournois, dins l’rue Lamendin, qui m’avot tapé dins l’oeulle : un demi-course Mercier comme chés vélos du Tour de France d’un biau vert (que j’ai core) avec 10 vitesses et j’ l’avos acaté . Mais parelle, y’ avot toudis un pétit bruit qui m’imbêtot, eune vitesse qui passot pas bien et j’arrivos jamais à l’régler ; j’démontos chés câbes pis j’arrivos pas à les armette, et comme l’rue Lamendin chétot trop lon, alors j’allos quand minme vire min marchand d’à côté ; mais là, qu’ i savot bien que j’l’avos acaté ailleurs, chétot pus l’ minme musique et j’bénéficios pus d’un régime éd’ faveur ! … bon j’y allos quand minme pour acater des patins ou des pétites ampoules éd’ lampe éd’ poque pour chés zéclairaches.
Pour min père aussi chétot pratique passe qu’ i avot fauqu’ 10 mètes à faire pour porter s’ mobylette à réviser pis aller l’arquerre.
Pour min tiot frère, mes parints i z’i avotent acaté eune auto à pédales, un « karting » qu’in appelot cha, eune fos pour s’ n’anniversaire (vire élle photo). Là y’avot pas b’soin d’ faire des réglaches, y’ avot juste deux pédales à aillonner pis un frein à main qui bloquot chés reulles. Cha m’ faisot invie passe que j’avos pas eu cha à s’ n’âche, j’avos eu qu’eune trottinette. Alors souvint, sous prétexte d’i faire vire commint qu’i fallot pédaler, j’ m’incrinquos d’ dins et j’ faijos des tours dins l’ cour, ch’ volant braqué à fond passe que l’ cour alle faijot 4 mètes sur 4 ! L’ cour alle étot pas plate, loin d’ là, alors i fallot forcher sur chés pédales pou monter in haut pis essayer d’ pas s’artourner in bas in prénant ch’ virache … Pendant ch’ temps-là, min frère i grognot pis i’ allot s’ plainde à m’ mère que j’ voulos pas i rinde sin karting… Et jé m’ faijos inguirlander.
Jé m’ rappelle pas qu’in avot acaté aute cosse à ch’ marchand d’ vélos. Pétête eune trotinette … Des marchands d’ vélo à Bruay, i n’avot plein in ch’ temps-là : Michel Choquet, ch’ footballeux à z’ alouettes, ManuFrance et Tournois dins l’ rue Lamendin pis Nord & Loire in fache un peu pus bas; Perche rue d’ la République ; un aute dins l’ côte des grands bureaux … Pis cor sûremint plein d’autes que jé m’ rappelle pas ou qu’ jé n’ connaichos pas… Asteure, i n’a pus un seul ; ch’ dernier, Cycles Bérard qui étot su’ l’ grand route avant ch’ cimetière dé l’ Bussière, i a fermé aussi d’ pis belle lurette. Des vélos in n’a pus b’soin, tout l’ monde i’ a des carettes…
( 3 photos)