PETARDS Pleinvol partie 2
par berlens78 le, 31/01/2020Des fos, in y allot aussi pour acater des pétards ; y n’avot tous les sortes, des pétits, des moyens pis des gros, des « pirates », dins des paquets d’chinq ou dix, des mitraillettes, des feux d’artifice aussi.
Chés pétards in avot l’drot d’les claquer qu’à chés fêtes du 14 juillet, à l’fête des écoles, pis à chés mariaches. Y avot aussi des boites d’amorces, des pétits confettis avec un tiot peu d’poude collée dessus ; qu’ in faijot claquer in tapant d’sus avec sin talon ou in les mettant dins des pétites fusées in plastic qu’in lanchot in l’air. (Vire chés photos pus bas). In tirot ch’ l’arsort du côté délle tiête rouge , in l’ coinchot avec sin dogt et avec l’aute main in posot su l’ plaque in fer eune amorce du bon côté et bien au mitan ; in arposot ch’ l’arsort délicatemenint par au-d’sus et in lançot l’ fusée in l’air él’ pus haut possibe. Des fos, comme élle cour alle étot pas grande, élle fusée alle arquéyot su ch’ toit au mitan d’ chés tuiles, ou alle dégringolot dins l’ gouttière ; que brin pour aller l’ récupérer. Fallot monter sur eune cayelle pis essayer dé l’ rassaquer avec él’ manche dé ch’ balai …
Dins l’ maison, l’ cache (chasse) à ch’ tchien alle étot ouverte; j’ m’ allongeos intre deux cayelles in attindant que ch’ tchien i passe in d’sous, et j’ laissos quère élle fusée su ch’ carrelache juste au momint qu’ i passot. I sautot in l’air ! Pas à causse du souffle dé ch’ l’ explosion, mais tellemint qu’i avot eu peur. Mi pis min frère, in riot aux zéclats. L’ pauve bête in l’traquot tout partout, alle étot pus in sécurité nulle part. M’ mère alle dijot « arrêtez d’imbêter ch’ tchien ! Vous allez l’ rinde maboule !! ». Bon i l’ étot déjà à mitan ; cha pouvot pas i faire éd’ maux ; pétête minme y’ armette ses zidées in plache … (photo 1 : fusées et amorces)
Chés amorces, in les trouvot aussi in rouleaux pour les mette dins chés révolvers ; ch’ rouleau i avanchot d’un centimète à chaque fos qu’in tirot un coup d’révolver ; et des fos i restot coinché ; ou bien ch’ l’amorce alle claquot pas. Pour juer à cha, ch’ camp d’ batalle chétot l’ grande salle à minger, qu’in pouvot s’ camucher in d’sous délle tabe ou derrière ch’ buffet et chés fauteuls. Cha canardot sec et y’ avot souvint des morts. Ch’ tchien, dins chés cas là in l’ véyot pas, i restot muché derrière élle cuisinière dins l’ cuisine in attindant la fin dés hostilités. (photo 2 : rouleaux d’amorces pour pistolets)
Dins ch’ poulailler aussi chétot la débandade ; mais là par terre chétot mou, chétot du brin d’ poule ; alors in prénot pas l’ fusée qu’ alle aurot pas pu claquer, mais in mettot putôt des pétits pétards mitraillettes à côté dé ch’ nid du qu’ alles faijotent leurs zoeufs, in rallongeant l’ mèche… In attindot dins un coin ; l’ poule alle arrivot tranquille, cot cot codac et alle s’ajouquot dins ch’ nid au mitan délle paille. Quand alle étot bien installée qu’alle bougeot pus, et qu’alle avot ses ziux fermés, in allumot l’ mèche … L’ poule alle sortot d’un coup comme si qu’alle avot vu ch’ diabbe et alle courot tout partout in s’ butant dins chés grillaches et in poussant des cris… In faijot cha quand min père i étot pas là sinan in aurot eu eune borniffe …
Y’ avot des pétards aussi qu’in posot in d’sous d’ ché pieds d’ cayelle et quand i n’avot un qui allot pour s’assir éd’ sus, i faijot d’abord un bond d’ deux mètes ; des pétards, i n’avot d’ tous les sortes et pour tous chés zoccasions !
Au certificat, in avot acaté des pétards « pirates », verts, gros comme des cigarettes, avec un bout jaune d’un côté qu’i fallot frotter sur l’ boite d’allumettes.Chés-là, i faijotent un boucan du diabbe. Surtout dins ch’ kiosque au Stade Parc et dins ch’ préau d’ l’école Pasteur qu’ cha résonnot à tout casser . I zétotent putôt réservés à chés grands ; enfin , pas trop grands non pus … Chétot quand minme assez dingereux passe que y’ avot pas d’ mêche ; fallot juste frotter ch’ bout su’ l’ boite pis l’ lancer aussitôt l’ pus lon possibe. In s’ bouchot nos zorelles mais des fos i s’ passot rien. In attindot pis in allot vire in s’approchant tout près, duchemint et pas trop rassurés… Au bout d’ deux minutes si y’avot pas claqué , in pouvot l’ ramasser et réssayer d’ l’ allumer mais bon, mi j’ m’y risquos pas trop, j’ laichos faire chés trompe-la-mort, chés kamikasses … I n’a qui dijotent qu’ i pouvot péter dins ses mains et s’artrouver avec des dogts in moins … Ch’ pétard i’ in valot pas l’ candelle… (Photo 3 : pétards Pirate)
Pleinvol, ché que des biaux souvenirs, des souvenirs d’ éfants ; d’abord, si j’ y allos, ché qu’ j’avos des sous ; et si j’avos des sous chétot déjà eune belle journée passe que j’avos eu un bon classemint, ou m’ n’anniversaire ou eune matante qui avot mis in douche (« faut pas l’ dire à ta maman ») deux trois pièches dins mes poches … Pour y aller, j’armontos l’ rue Alfred Leroy in courant mais souvint j’ y allos avec des camarattes et cha faijot comme des volées d’ moniaux ; chétot cor miux à pusieurs passe qu’in sortant in partageot : chés chuques, chés pétards, chés mauvais coups … Pleinvol chétot l’ point d’ départ éd’ tous nos grandes zavintures …
( 3 photos)