LA GOURMETTE EN ARGENT
par berlens78 le, 03/02/2020Allez, eune pétite histoire avant d’ardéchinde l’ rue Alfred Leroy ..
In parlant d’ Pleinvol, cha m’a rappelé eune (sale) histoire. Amont Pleinvol, i vindottent aussi des « bijoux » pour gosses, des chevalières, des bagues et des colliers pour chés filles, et aussi à un momint qu’ chétot la mode, des gourmettes in argent. M’ mère alle mé n’avot acaté eune pou’ m’ anniversaire un coup, avec min prénom gravé d’sus. J’avos pas l’ drot dé l’ mette pour aller à l’école mais j’ l’avos mis quand minme, pou l’ faire vire à mes camarattes dins l’ cour éd’ récréation. Et j’ l’avos perdue in arvénant, sûremint dins un rucheau délle rue des Alpes ou du Jura ! Que drame ! J’ sus artourné cacher après au soir mais j’ l’ai pas artrouvée ; sûremint un qui l’avot trouvée, ramassée, et mis dins s’ poque… (vire elle photo)
V’là l’ samedi arrivé, ém’ mère alle m’ dit que j’ pourros l’ mette él’ lendemain pour aller à l’ messe ; catastrophe ! commint qu’ j’ vas faire ! J’ peux pas li dire qué j’ l’ai perdue ! pis à l’école surtout, qu’ j’avos pas l’ drot dé l’ prinde ! …
J’avos pus assez d’économies alors él’ samedi après-midi, jé pas trouvé mieux que d’ voler des sous dins l’ porte monnaie dé m’ mère, qui étot toudis posé su ch’ l’appui d’ ferniette délle cuisine. Et j’ai couru amont Pleinvol pour in racater eune. Cha coûtot quère ; et alle pouvot pas graver min nom d’ sus comme cha, qu’ chétot sur commande, que j’ devos arpasser pis i laisser. J’ l’ai pris quand minme, qu’alle étot un peu pus grande, et j’ sus rintré avec.
L’ lendemain, pour aller à l’ messe, j’ l’ ai mis à min pognet. Mais in l’ muchant in tiot peu sous l’ manche éd’ min paletot. À l’ sortie, in a vu des gins comme tous les diminches, et m’ mère alle a pas pu s’impêcher d’ vouloir leu montrer m’ gourmette ; mi tout péteux, que j’ savos qu’y avot pus min prénom gravé sur l’invers, j’ voulos pas trop l’ faire vire. Ché là que m’ mère alle s’a aperchu qu’ chétot pas l’ minme qu’alle m’avot acaté. Mais alle a rien dit tout d’suite
In rintrant à l’ maison, cha a été l’interrogatoire (musclé) ; « Du qu’alle est l’aute que j’ t’ai acatée ? » « Té l’as perdue ? » « Té n’as racaté eune aute ? » « Té vas réponde ouais ou nan ? » « Du qu’ t’as eu chés sous ? » « j’ les ai trouvés par terre … » « Té z’as trouvé par terre ? Té t’ fous d’ mi ? Té cros pas que j’ vas gober cha ? Du qu’ té z’as pris ? Dins min porte monnaie ???... »… Alors alle a été vire sin porte-monnaie, su ch’ côté avec eune pression du qu’alle mettot ses billets . Et y’ in manquot un ; un gros ; un d’ dix mille francs (anciens) j’ cros bien. « Té z’as pris dins min porte monnaie ?? Ché ti hein ? Cha peut ête que ti ! hier i y’ étot core ! » et alle m’aillonnot d’ tous ses forches, comme si qu’alle aurot voulu mé l’ faire arcracher ch’ billet !!! Mi j’ brayos. Qu’ j’avos tellemint peur dé m’ faire disputer que j’ l’avos perdu, qu’ j’avos pas osé l’ dire. Et qu’ j’étos allé in racater eune aute …
« Té un minteux ! et in plus té un voleur ? Des voleurs dins l’ famille, i n’a jamais eu !!! ché ti qui va commincher ? Nous déshonorer ? Quo qu’in va faire éd’ ti asteure ? Té vas devenir un voyou ? Aller in prijon ????.. »
Pouhh ya ya … Quo qu’ j’avos fait …. J’étos pas un voleur ; j’ voulos juste pas i faire du chagrin qu’ j’ avos perdu min cadiau d’anniversaire… J’auros pas dû prinde ses sous ; j’auros dû d’ mander à mémère, alle aurot compris elle …
J’ raconte pas l’ torgnole é’ qu’ j’ai pris ch’ jour là. Pis privé d’ télé et surtout d’ Piste aux zétoiles pendant un mos. In plus j’ai eu eune punition, « je ne dois pas voler de l’argent dans le porte-monnaie de ma mère », à copier au moins deux chint fos et qu’ j’ai dû faire signer l’ lundi par ch’ directeur d’ l’école Pasteur, Monsieur Gorrée … J’y ai passé tout min diminche après-midi. Et dernier châtimint : j’ai dû arporter l’ gourmette amont Pleinvol pour récupérer chés sous. Que honte !....
Après cha des gourmettes in argent, jé n’ai pus jamais eu ; et jé n’ai pus voulu non pus. J’étos vacciné. Et j’ai réfléchi à deux fos avant d’aller voler dins l’ porte monnaie dé m’ mère. Cha valot vraimint pas l’ coup ….
( 1 photos)