UN VIUX pinsées filozofiques
par berlens78 le, 25/03/202065 ans ; à ch’ t’ache là, dins le temps, in étot un viux ; un viux grand père
J’avos 10 ans, j’avos 20 ans, et minme à 30 ou à 40, pour mi quéqu’un qui avot 65 ans chétot un viux ; mi j’étos jeaunne, jé l’ séros toudis, tout i allot bien, y’ avot aucune raison que j’ seuche viux un jour. Chés viux, i zavotent toudis été viux ; par exempe, min grand père, i’ a toudis été min grand père, et donc i a toudis été viux ; jé n’ l’ai jamais connu jeaunne. Mémère, parelle. Donc y’ avot des jeaunnes, des parints et des viux. Chés viux, i vénotent au monde viux, chés parints i vénotent au monde avec leurs gosses. Le monde i étot fait comme cha. Et i avot pas d’ raison qu’ cha seuche autremint.
Sauf qu’in i ravisant d’ pus près, qu’ jusque là j’avos pas trop fait attintion à mes anniversaires, jé m’ rinds compte qué j’ viens d’avoir 65 ans, l’ minme âche qui avot min grand père quand j’étos jeaunne ! Et in ravisant autour éd’ mi, j’ m’ aperchos qu’y a pus gramint d’ monde au-d’ sus d’ mi, qu chés pépères et chés mémères, chés mononques et chés matantes, et minme mes parints, i sont tous partis ! qu’ cha s’ra bétot mi ch’ pus viux ! et qué j’ sus arrivé dins chés premiers su’ l’ liste d’attinte !!!
Pourtant ché bizarre, jé m’ sins pas viux ; pas tout jeaunne non pus, mais in tous cas pas un grand père. J’ passe pas mes journées assis sur un banc à raviser passer chés gins ; jé m’ précipite pas sur min baromète tous les matins pou savoir si j’vas avoir des rhumatisses ou pas ; j’ m’indors pas au soir à 10h in lijant min journal à min coin d’ fu …
Dins m’ caboche non pus jé m’ sins pa viux. Souvint jé m’prinds minme pour un jeaunne, quand j’arvos mes souv’nirs ; j’ pinse parelle, si chétot à arfaire, j’ féros parelle. Ém’ chervelle alle a pas pris eune ride. Ché vrai qu’ pou l’reste, é’ z’articulations, tout cha, j’ pourros pus vraimint faire un cent mètes in 10 s’condes ou traverser un terrain d’ football pour aller marquer un but... Mais bon, j’ vas pas cor avec des bâtons ! Tant qué j’ sus assis cha va, faut pas que j’ m’ arlève trop souvint.
Avant, à 65 ans, tous ché viux i zétotent viux. Mais asteure ? In in vot à l’ télé des d’ 80 ou 90 ans qu’in leur in donnerot 40 ! Sans parler d’ chés femmes, comme Line Renaud par exempe !... Alors, y’ aurot pus d’ viux ? I resterot pus qu’ des séniors ? In y arpinsant, ché vrai qui zavottent supprimé ch’ troisième ache, y’a eune paire d’années ; et chés pépères et chés mémères aussi, qui zavotent rimplaché par des papy et des mamy …
« 65 ans ? ah ben vous êtes tout jeune encore Monsieur Dourlens ! ». A forche d’intinde cha, j’ vas finir par élle croire ! Quand minme, ché bizarre … In s’ rot jeaunne tout s’ vie ? Cha s’ rot juste eune fos qu’in aurot passé d’ l’aute côté qu’in aurot drot à tite posthume à nou bâton d’ vieillesse ? « 95 ans ? c’est un bel âge pour partir , hein ! il en a bien profité ! il a eu une belle vie ! »
Bon, cha va ; cor trente ans d’vant mi avant d’ ête viux …