Les jardinsSujet fille de : retour de Merlimont 72 fin
par loumarcel le, 11/05/2020Bonjour Tertous,
Bin nous in prénot aussi l’minme route qu’Minloute pour ar’vénir d’nos vacances à Berck pas à Merlimont, passe qu’in campot dins ch’bos Magnier, à ch’t’époque vers les années 50-55 i y avot qu’inne dizinne d’tentes, pas d’toilettes mais de l’iau pou s’laver, pou faire l’vaisselle (pour les WC in faisot un trou qu’in intourot d’branques, facile ch’ étot du sape et i y avot gramint d’apes), in plantot l’tente canadienne sans problinme d’surface in étot pas gramint d’campeur et ch’étot gratuit.
Pour dormir em’mère ale avot fait des grands sacs avec de l’toile à mat’las et in y métot n’dins du foin pour faire des paillasses pou s’coucher d’sus. Pus tard in a eu des mat’las pneumatiques et des duvets qu’in avot accatés à Béthune amon Labenne pas loin d’la gare un esspécialiste du campine.
D’l’aut’ côté de l’route qui allot directemint à la plage i y avot s’qu’in app’lot ch’catiau du bois Magnier, inne belle batisse intourée d’apes aussi, et i y avot aussi des animaux, si je m’rappelle bien cha devot ête un centre pour passer des CAP.
In truc que je souviens cor ch’est d’avoir secouru un bouc qui avot pris ses cornes dins ch’grillach’ et in ar’vénant à l’tente j’me sus fait enguirlandé passe que j’puot l’bouc à plein nez, bin je n’savos pas cor qu’un bouc cha puot comme cha, j’étos cor pétit
Bin ouais ch’est des souv’nirs vintage
( 2 photos)
