DERNIERS COMMERCANTS AVANT LE LYCEE
par berlens78 le, 01/06/2020OPIGEZ maroquinerie Opigez-Soleil
Y’ avot des sacs à main, des valises et des pépins plein l’vitrine ; tout cha l’un sur l’aute mais pas n’importe commint ; cha donnot l’impression d’un choix phénoménal ; pus tard y’avot minme un présentoir à tourniquet sur ch’ trottoir avec des parapluies tout cha. Jé n’sais pas si chétot l’ minme famille mais des Opigez i n’avot tout partout : dins l’ rue des escaliers ch’ marchand d’ rideaux ; horlogerie Opigez rue Jules Guesde ; cor un magasin d’tissus intre l’ librairie Dupont et Wartel ch’ l’ armurerie dù qu’y avot in vitrine des fusils et des coutiaux ; et su ch’ marqué du centre l’ vendredi et ch’ marqué d’ la gare l’ diminche aussi y’ avot des étalaches Opigez ; et j’ cros qu’i z’y sont cor l’ diminche matin au marché d’ la gare à vinde des sacs à mains, des portefeulles, des cheintures …
PLOMION « Au Renard Bleu »
Chétot un magasin d’ fourrures ; des mantiaux, des manchons, des toques … A deux pas d’ chés corons du 4 ! Mais y’ avot des magasins pour tout l’ monde et cha nous imbétot pas. Ch’ti là, i étot sûremint plus pour chés femmes éd’ commerçants ou d’ingénieurs qu’ chés coronnières … J’y sus jamais rintré et jé n’ravisos minme pas l’ vitrine in passant devant … Qui ché qui acatot des mantiaux in fourrure ? Pas m’ mère in tous cas, ni personne qué j’ connaichos dins min coron. Et d’abord i faijot pas trop clair dins l’ boutique là et y’ avot jamais un tchien. Rien qu’ chés prix, cha donnot l’ vertiche !
Des fos, quand minme, j’ pouvos pas m’impêcher d’ jéter un coup d’ oeulle pour vire l’ piau d’ chés bêtes : des panthères, des visons, des loutres, des ocelots … Du lapin aussi mais cha jé n’avos dins m’ cour … Chti qui m’ faijot rêver, chétot l’ renard bleu ! … un renard déjà j’ trouvos cha biau d’ avinche, mais alors bleu … Dù qu’in trouvot des bêtes comme cha ? Au pôle nord ? In Australie ? Au bout du monde ?... J’ l’imaginos s’ faufiler intre chés grandes zherbes, avec s’ fourrure bleu nuit qui faijot des arflets sous l’ pleine lune et ses ziux fluorescents … mais dé m’ dire aussi qui tuotent des bêtes comme cha pour in faire des mantiaux pou chés vielles biques aller à l’ messe l’ diminche in paradant au premier rang, cha m’ dégoûtot…
Et cha m’ dégoûte cor..
Librairie BEGHIN
In s’rappelle tous délle librairie DUPONT, chelle du lycée in bas délle rue mais pas délle librairie BEGHIN ; j’ai pas gramint d’souvenirs non pus ; alle a pas dû durer longtimps. Chétot ch’ dernier magasin avant l’ lycée Carnot, eune grande batisse carrée tout vitrée. Chétot immense avec des présentoirs et des liffes tout partout. J’y allos des fos pour lire des Tintin, assis dins un coin. Et un coup qu’ j’avos eu des sous à m’ n’ anniversaire pour mé n’acater un à mi tout seu, j’ y étos allé pour les raviser tous et un cujir un. Mais l’quel prinde ? J’y sus resté au moins eune heure : Tintin au Tibet avec l’ neiche et chés montannes ? L’oreille cassée avec chés forêts d’Amazonie ? Le trésor de Rackham le rouge avec la mer et chés paquebots ? A forche d’ raviser, min choix i s’avot porté sur « le temple du soleil » passe qu’in ravisant bien, i’ avot un tiot peu tous les zautes liffes dins ch’ti là…
Ché l’ seul Tintin à mi qu’ j’ai eu ; et jé l’ai cor…