BERCK 2020 SOUVENIRS
par berlens78 le, 03/09/2020Alors chés vacances à Berck, cha s’a bien passé ch’ t’ année ?
Vous avez eu biau temps ?
Y’a qué dé l’ pleuve !... Ah bon ! Bin ichi in n’a pas eu eune goutte ! Min persil i est tout réchué du solelle et mes géraniums, j’ai dû les arroser deux fos par jour …
Y’ avot du vint ?... Ah mais cha, ché souvint à Berck qu’y a du vint ! Du vint frod qui vient d’ la mer et qu’in a du sabe plein ses ziux ! Dins l’ temps quand cha soufflot comme cha, in allot à l’ baie d’ l’ Authie, ou bien in s’abritot derrière chés cabines ….
In peut pus ? … Des cabines i n’a presque pus ? Pis alles sont toutes éd’ berzinque avec des trous in d’sous ? Avec des canettes et des boites macdo qu’ chés jeaunes i z’ont pus l’ courache d’ aller mette à l’ poubelle ? Que époque !... Cha dégoûte… In véyot pas tout cha avant
Enfin vous n’avez bien profité quand minme … Nan ? Pas d’ trop … Ah bon … Ch’ tiot i’ a été malade ? Avec dé l’ température ? Vous avez dû appeler ch’ docteur … Et quo qu’ ché t’i qui nous a fait ? Eune angine ?... Pauv’ jeaunne ! Y’ a dû suremint prinde frod au soir sur l’esplanade …
Et chés cerf volants ? Ah ! cha, cha dot ête biau à vire ! … Y’ a eu ch’ concours ? Nan… ? I n’a pas eu ch’ t’année ? Cha a été annulé ? A cause dé ch’ virus ? Ah ya ya, que jus avec cha ! Bin ichi cha a été parelle ; i zont annulé ch’ corso fleuri pis ch’ fu d’artifice … que triste été ! …
Comme él’ ducasse, alle a cor’ rapétiché l’année chi … Y’ a pus chés foules qu’in véyot avant … A Berck, i z’ont fait l’ ducasse quand minme derrière él’ gare routière ? … Ah bon! ché pus eune gare ?... Ché un casino … Bon mais y’avot des manèges ? Nan, pas gramint … Ché pus comme avant, hein, vous vous rappelez tous chés loteries, chés marchands d’ nougats, tout cha, chés zautos tamponnantes, chés zavions !... chés jeaunnes i n’étotent sots, i voulotent pus déchinde !...
Chu qui est bien à Berck ché d’aller faire un tour au soir sur l’esplanade, s’assir su ch’ mur et raviser passer chés gins in mingeant eune glace, qu’in a eu bien caud tout l’ journée ... Y’ avot pas grand monde ? Vous avez quand minme été minger eune glace au Cornet d’amour ? Non pus… Ché trop quère … Ché sûr, à quate, cha dot buquer !...
Et Bagatelle, j’ y arpinse, vous avez été passer eune journée comme tous z’ans ? Ché toudis aussi bien, chés animaux dins ch’ zoo, chés balançoires, ch’ pétit train … ? Et l’intrée, à combien qu’alle est asteure ? Combien ??? … 27 euros l’intrée par personne pis 20 euros pour chés gosses ???!!... Pis faut cor payer ch’ parkinne in plus ?... Vous rindez compte, cha fait 100 euros à 4 ! … Pis y’a pas qu’ cha, faut cor acater à minger !! Chucher eune glace … Boire un verre avant d’arpartir … Ah ! bin , j’ comprinds qu’ cha arvient quère des vacances à Berck !
Du coup vous avez resté qu’eune semaine ? Bin ouais, jé m’ doute bien ! In peut pus y’ aller un mos comme avant ! pis chés locations, cha dot pas ête donné non pus... Faut compter combien asteure au mois d’aôut ?... 600€ pour eune semaine ? … Bin dis-donc ! … Ah ! mais chétot pas lon d’ la mer … Ouais mais quand minme !... Pour eune semaine … Vous vous rindez compte pour un mos ? ! Qui ché qui peut payer des sommes parelles ! Avec ém’ tiote pinsion, mi j’ pourros pu y’ aller, in vacances ! déjà rien qu’à payer l’autobus …
Enfin chés gosses, i zétotent contints ? I n’ont bien profité ? I z’ont été s’ baigner ? L’ iau alle étot froide… Et péquer des crevettes dins chés flaques ? I n’a pus… I z’ont jué dins l’ appartement … Ah bin, que voulez-vous, à Berck, in réussit pas tous z’ ans ! Cha ira miux l’année prochaine… Ah nan ? Vous z’ y artournerez pas ? Vous pinsez aller dins l’ midi cacher après du solelle ? Ché sûr là-bos i fait plus caud mais y’a du monde aussi … Et faut faire la route, y’ a eune sacrée trotte …
D’ichi là faut cor’ pinser à l’ rintrée, rhabiller chés gosses, racater chés affaires d’école, tout cha ; pis des masques aussi l’année chi ! Que jux avec leu virus ! Mette des masques à l’école ! Comme si qu’in férot mardi gras à l’ rintrée !.. In vit eune drôle d’époque ! Dù qu’in s’in va ?... Commint qu’ cha va finir tout cha ! … Diminche j’irai mette un cierge à l’église Sainte Barbe (1)…
Allez bin, bonne rintrée quand minme …
(1) : L’église Sainte Barbe alle a fermé d’ pis belle lurette, ché un musée asteure ; mais j’ai pas osé li dire …