l'os à moelle
par minloite le, 25/10/2020nous zarvlà chi cinquante ans en arrière, in est tous autour del tape, in est samedi , jur d' bouillon
in' l' conno le rituel
m' mère ale nous servo ch' bouillon dans ché zassiettes creuses...
nan minloute, j' t in mets pas plus , y a cor ché légueumes à faire .....
cha y est j 'va avoir drot al' réflexion d' min père et j y coupe pas ..." té conno pas la poussée d Archimède minloute ?"..
j' réponds pas j' sais qui embraye tout d' suite après par "tout corps plongé...." j in passe et des meilleures
y a qu' li qu' cha fait rire à chaque coup, et là m'mère ale li fait l' réflexion qu au lieu d' faire s' n intéressant qui tende s' n assiette car "mi aussi j' voudro bin minger" ......
min père i s exécute tout d' suite
cha y est m' mère ale ramène l' viante, le riz pi la sauce tomate ...
autour del tape, in discute pu, ché tindu .........
non pas qu in est carnassier al'viante pour ch' boeuf, non pas qu in va compter l' nompe d' cuillères d' riz d' l'assiette du vigin, nin celle d' sauce tomate ....
min père i coupe ché morciaux d' viante, et pendant ch'temps là, nous in ravisse tous m' mère
ale a pris ch'pain, et ché oches, et in l'vo mette ch'coutiau à l'intérieur pour faire querre la moelle dins n' assiette ......
ale sait que tout l'monte i la ravisse, et ale sait qu ale do faire attention....
ale étale bin la moelle su ché tartines, pi après ale nappe cha d' sel et surtout d' poive
et là cha d'vient sérieux, tout l' monte i est pret à sortir sin pied à coulisse, faut que ché parts ale so les memes sinon ch'est l' drame à table ....
eh m'man mi j'in a moins ........
m' mère ale leffe les ziux au ciel, ch'est pas pour cha qu'ale va mesurer ché parts ...
ale dit simplemint "j' comprinds pas commint vous vous battez pour cha , mi ch' am' dégoute" ..... bin mi non ....