El nœumint d’aiguiliette

(le nouement d’aiguillette)

Gustin (Augustin) fréquente el jone et bellote Gélique (Angélique) et l’ mariache est prévu pou l’lindmain. Gustin, li qui dévrot ête tout à foufielle, simbe bin infnoulié (tracassé).
I est assis su l’tronc d’un sau (saule), el long dech ruchau et jechte de tiots caillaux dans l’iau. Sin frère aîné Eloué (Eloi) s’rind compte que quétcosse i n’va pàs chez sin frère alorse, i s’assit tout à côtè d’li.

« Alorse Gustin, t’in fait eune tiête! li dmande sin frère. In dirot pàs qu’te vas marioler dmain. A quo te souques (songe) min gars ? »
Gustin ne répond rin ; i ne saye (sait) pàs s’i peut déblouquer sin cuèr (confier) à sin frère.
« Te peux tout m’dire, ej sus tin frère ; qui li dit Eloué. »
-T’as apprins chou qui s’est paché pou Louis 1er de Flande ?
-Ouai ! In li a jechté le sort d’aiguiliette. Quelle drôle affaire hein ? Ch’est donc cha qui te tarabistoque (tracasse) ; qu’in fait parél pou ti !
-Et bin ouai.
-C’est pàs l’minme cosse. Louis 1er de Flandre a tout plein d’ennemis. I s’est fait proclamé comte de Flandres sans l’aval du roy passant dvant d’autes prétindants come Guy Grimaud. In plus, i est fort impopulaire avec ches Flahutes. Mais ti, t’as pàs d’ennemis.
-Pit-être que j’n’ai. Gélique, ch’est l’plu bielle file du villache et alle aussi, alle a gramint d’prétindants. Ej sus dans l’minme cas qu’li.
-Te t’fais des idèes min chochon. Mais si te veux avoèr l’esprit trinquile, in peut aller vir Marie courtelotte (courte et grosse). Alle in saye des cosses ; alle nous dira quo. »

Alorse, les deux frères vont vir chelle dame. Alle reste dins eune vielle cassine (maison délabrée) àl liste (lisère) del forêt.
« Bojour Mdame. In a eune question pou vous.
-J’tacoute min gars.
-Os connaichez el sort d’aiguilliette ?
-Ah ! Bin seûr ! Te m’prinds pou eune guindoule ou quo !
-Y a-t-i quéqu’un qui a vénu pou vous dmander de jecher che sort-là tout récemment ?
-Min garchon, si te veux savoèr quécosse, i faut payer ! »
Gustin sorti 3 iards de s’tasse.
« Cha suffira ?
-Pou l’momint ! Pou réponte à t’question. Nan parsonne i a vnu.
-Ah ouf !
-Oui, mais tout l’monde i peut jechter ech sort . I ne faut pàs ête chorceron (sorcier) ou chorchelle (sorcière) pou l’faire.
-Donc, y a un risque ?
-Pit-ête bin qu’oui.
-Alorse, bin qu’est-ce qu’in peut faire ?
-Avanche l’heure des noces.
-Impossible ! Qu’est-ce qu’in peut faire d’aute ?
-Les temps sont durs te sayes. Donne-me cor quéques pièches et j’te dirai. »
Alors Gustin i sort incore eune pièche d’eus tasse.
« Te peux mette du sé dans t’tasse et des sous dans tes soulis (souliers).
-Et c’est tout ? Cha parrot tout simpe !
-Pou qu’cha marche. Te ne feras intrer l’anniau de tin bin-aimée esqu’à el preume jointure d’sin dogt. Insuite, te feras quer l’anniau su l’dainne et te battras les pieds et t’tiête sous el poile (le voile des mariés). 
-Mais, si j’fais tout cha ; j’sra godiche !
-Miux vaut passer pou eune ambrandoule que d’ête molasson dal biroute.
-Bon j’ferai come os dites.
-Ch’est cha min garchon et bonne gaudriole ! »

Gabriez Caux
Banque chtimi

Le nouement d’aiguillette.
L’aiguillette, c’est une braguette à l’ancienne.
Le nouement d’aiguillette est un maléfice terriblement redouté par nos ancêtres. Il s’agit d’une opération magique fomentée par quelques sorciers malfaisants, consistant à empêcher un homme de consommer son mariage.