CANTEUX D AVANT
par berlens78 le, 18/11/2020Dé l’ musique à l’ baraque, quand j’étos jeaunne, i n’avot quand minme souvint ; intre ch’ tourne disque et ch’ transistor qui allot du matin au soir, y’ avot d’ l’ambiance.
Au début y’avot qu’un poste à lampes ; un Ducretet-Thomson que chétot, l’ marque qu’alle vindot Madame Chalmin à ch’ coin (photo 1). I fallot l’allumer, au sens prope, (enfin pas non pus avec des allumettes) et attinde que ch’ cadran avec ch’ l’aiguille i s’éclaire ; pis cacher dins tous chés zondes, des longues, des courtes, des moyennes, avec ch’ gros bouton. In pouvot acouter Andorre, Milan, Budapest, et surtout Hilversum, nom mystérieux intre tous, qu’ cha devot s’trouver au fin fond du pôle nord … Jé m’rappelle pus pou ch’ l’antenne. In intindot baragouiner tous les langues, minme du russe et du polonais. Eune fos à peu près calé su l’ station, cha crachotot, cha sifflot, l’son i s’in allot et i arvénot ; in avot l’impression d’intinde des voix d’ l’au-delà, des gins qui nous parlotent d’un aute monde … Mais souvint in s’ contintot d’ mette ch’ l’aiguille sur Luxembourg ; jé m’ rappelle vaguemint d’ Maurice Chevalier, d’ Zappy Max (photo 2) qu’in acoutot « quitte ou double » pis un feuilleton qui ténot mes parints in haleine, qu’à chaque fos i fallot s’ taire, « la famille Duraton » j’ cros bien … Au soir, avant d’aller s’ coucher, m’ mère alle l’arcouvrot d’un napperon in dentelle, pétête pour qu’i prenne pas frod dins l’ nuit que l’ cuisinière à carbon alle allot au ralenti …
Après y’ a eu ch’ transistor ; plus pétit, plus pratique, plus moderne ; li i pouvot aller avec des piles et in pouvot l’ prinde sous sin bras et aller l’acouter dins sin lit par exempe, enfin, in théorie seulemint passe que i’ étot à tout l’ monde et i’ étot pas question dé l’ garder pour ti tout seu ! … In pouvot acouter Europe1, Luxembourg, Monte Carlo (« Dis, t’as vu Monte Carlo ? » « Nan, j’ai vu monter personne … ») ; et aussi radio Caroline au soir in cachant bien avec s’ n’ orelle collée d’ sus … Eune radio pirate ! Des vrais pirates avec ch’ drapeau noir à tête éd’ mort ? Ouahh ! Les Hollandais volant … ! Parait qu’i zétotent sur un batiau dins la mer du Nord et qu’i zavotent pas l’ drot d’arvénir à terre qu’i se s’rotent tous fait arrêter ! … Et qui zétotent ravitaillés comme cha in pleine mer … (photo 3) Radio « Carolaïïïne » ! rien qu’à intinde ch’ l’indicatif in étot in transes ! … Les « scarabées », les « pierres qui roulent », « Eugène Vincent », les « chats d’ose », … y’avot du rock and roll non stop ! In n’intindot pus qu’ des guitares électriques et des cris d’ hystériques …
Au début, y’ avot qu’un seul transistor et s’ plache chétot dins l’cuisine, su ch’ l’armoire à vaisselle. Au matin i’ étot pas allumé, qu’in s’in allot à l’école. Mais j’ m’in rappelle des fos au soir, qu’ mes frères i z’acoutotent « Salut les copains » avec tous chés idoles des jeunes. L’ diminche matin, chétot les prévisions du temps qu’i allot faire avec Albert Simon, pis chés pronostics du tiercé d’ Maurice Bernardé ; m’ mère alle acoutot cha religieusemint et i fallot s’ taire pendant qu’alle marquot chés numéros sur sin journal. Après, in pouvot intinde Sheila (« l’école est finie »), Claude François (« si j’avais un marteau »), Richard Anthony (« et j’entends siffler le train »)... tout cha. Au matin chétot assez calme ; cha s’animot après 5h et surtout au soir qu’ chés grands i mettotent Radio Caroline pour acouter des « zazous » qui cantotent in inglais.
Mi j’étos pas cor assez grand pour avoir des goûts prononchés ; alors j’acoutos tout chu qui passot ; délle musique chétot gai, chétot bien, in avot l’impression qu’in étot diminche tous les jours. Surtout l’ samedi soir, qu’y avot dé l’ buée plein l’ cuisine après chés bains dins l’ bassine d’iau caude, que chés grands i s’ préparotent avant d’ sortir au bal : ch’ transistor i allot à tout casser, cha impestot l’iau d’ cologne et l’ brillantine (Pento), i zessayotent d’faire leus noeuds d’ cravate avant d’ cacher des boutons d’ manchette assortis et d’ chirer leus godasses … Y’avot d’ la joie, qu’i aurot pu canter Charles Trenet si i’ étot rintré à ch’ momint là dins l’ cuisine …
Eune fos qu’i zétotent partis, in pouvot dire ouf. Ch’ calme i étot arvénu ; et après souper, in juot aux bidets in acoutant les 78 tours dé m’ mère su ch’ tourne-disques : Berthe Sylva (« frou-frou », « les roses blanches »), Georgette Plana (« on n’a pas tous les jours 20 ans »), Gloria Lasso «(« l’étranger au paradis »), Rina Ketty (« J’attendrai »), Édith Piaf (« Milord »,…), … Mais pas Juliette Greco « eune garce » ni Brigitte Bardot « eune dépravée », cor moins Marlène Dietrich « eune boche » ou Maryline qu’alle avot pas cor traversé l’atlantique …
M’ mère alle acoutot ses disques quand alle avot la paix, dins l’après-midi qu’alle avot fini l’ lessive et sin ménache, qu’ min père i étot au traval et chés grands au lycée ; alle mettot sin disque su ch’ Teppaz posé su l’ cayelle à côté dé ch’ buffet dé l’cuisine, et s’asseyot au coin d’ sin fu avec eune tasse éd’ jus, souvint avec s’ mère, pour acouter ses canchons tranquillemint. Mais au soir, qu’ chés grands i rintrotent d’ l’ école, chétot eune aute musique : chés « cauchettes noires », chés « cats sauvaches », Johnny « viens danser le twist » , Elvis, les Beach Boys … Que ambiance ! Des fos i voulotent faire danser à m’ mère le twist, le djerk, mais y’avot pas moyen ; pour elle chétot dé l’ musique éd’ dégénérés, d’ sauvaches ; chés danses là chétot la décadence, la fin du monde ; aller savot danser qu’ la valse et incore …
Mémère, elle, alle acoutot pas d’ musique ; minme pas dins ch’poste ; alle avot quère du calme, du silence, intinde ses mouques voler. Quand in voulot i faire acouter eune canchon qui passot dins ch’ poste, alle s’arculot in mettant s’ main devant s’ figure, comme si qu’in li aurot présenté ch’ diabe … Comme musique, alle connaichot sûremint que l’ sonnerie aux morts que l’ fanfare alle juot devant ch’ monumint aux morts le 11 novembre , et des cants d’église comme « plus près de toi mon Dieu .. »…
Ah si ! alle avot quère l’opérette ! Jé n’sais pas d’ dù qu’ chétot vénu passe qu’alle avot jamais été in vire, qu’y avot pas d’ théate et cor moins d’ opéra dins sin villache… Pétête au cinéma … Dins l’opérette, chti qu’alle préférot chétot Luis Mariano ; et j’cros bien qu’in étot allé vire au cinéma un film dù qu’i juot, cha devot ête "Violettes impériales" ou alors "ch' canteux d' Mexico" ... Aller vire un film avec Louis Mariano au cinéma, chétot vraimint pour i faire plaisir à mémère, qu'alle y aurot jamais été tout seule ... Passe que sinan, que punition !!...
Y' a eu aussi Dario Moreno, Georges Guétary, André Dassary, … et JOSELITO, « le rossignol des montagnes »... !!! Joselito … (photo 4) Mémère alle in raffolot et alle m’ suppliot d’aller vire ses films avec elle au Familia rue Jules Guesde. Que barbe ! Mi i m’ transperchot mes zorelles ; pis aussi que manie d’ canter à tue-tête comme cha tout partout dins chés rues ! … Un coup, j’y avos dit « ouais » à mémère mais j’avos ravisé avant su ch’ journal ch’ programme des cinémas à Bruay et Joselito i y’ étot pas au programme, contrairemint à chu qui z’avotent annonché l’ diminche d’avant. Chétot rimplaché par « les derniers jours de Pompéï » … mais mémère alle étot pas au courant. Eune fos chés billets acatés et arrivés dins l’ salle, alle s’a assis tout continte à côté d’ mi, ténant min bras, et chuchotant à m’ n’ orelle « té vas vire, cha va ête biau ! »… Mais, dès chés premières zimaches à l’écran, qu’ chés acteurs i zétotent habillés in romains avec des boucliers et des armures, mémère alle a eu un doute : Joselito chétot plutôt un canteux pour chés viux d’accord, mais chétot quand minme pas un canteux d’ l’ antiquité ! … Quand qu’alle a compris qu’alle s’étot trompé d’ film, alle voulot s’in aller, tant pis si in avot payé nous plaches ; mais mi j’ voulos pas partir ; cha m’plaijot ch’ film là ! Mais elle, alle avot pas quère des batalles, du sang, des épées tout cha et alle arrêtot pas d’aillonner min bras pour sortir …
Ém' mère alle devot sûremint n’avoir aussi des 45 tours d' chés canteux là, et ale devot i’ in mette un d’ timps in temps su ch’ toune disque l’après-midi quand in étot à l’école.
Min père, li, chétot Tino ROSSI ; presque esclusivemint ; i connaichot tous ses canchons par cœur , et i les cantot minme à chés festins d’ mariaches et d’ communions... I arsennot d’ailleurs un tiot peu à Tino Rossi (nous in dijot Tino Rosbeef pou l’ faire inrager !), avec ses ziux bleu-gris et ses cavux plaqués avec dé l’ brillantine … Y’avot aussi les compagnons de la chanson, qui faijotent l’unanimité, surtout quand i cantotent « toutes les cloches sonnent, sonnent… » avec Edith Piaf.
Et mi alors, quo qu’ j’avos quère ? Françoise Hardy, Petula Clark, Richard Anthony, Adamo, Franck Alamo … J’étos pas cor trop fixé. In n’in étot qu’au début ; cha allot ête un raz-de-marée radiophonique ; et dé l’musique in allot n’ ête abreuvés jusqu’ à pus soif !
Avant qu’ cha seuche rimplaché par des réclames pis dé l’ publicité, pis asteure par des « nouvelles qui sont mauvaises, d’où qu’elles viennent » …
( 4 photos)