PAQUES Partie 2
par berlens78 le, 01/04/2021Et enfin chétot Pâques ! L’ diminche éd’ Pâques ! Chés cloches, qu’in les avot pus intindues d’ pis eune éternité, alles z’étotent arvénues d’ leu escapade à Rome et alles sonnotent à toute berzinque ! J’ comprénos pas trop commint qu’ des ailes alles pouvotent pousser sur des cloches mais bon, in n’étot pus à eune mintirie près ! … Cor moins commint qu’alles faijotent pour aller à Rome sans s’ tromper d’ route mais, bon, là aussi, cha devot ête ch’ bon Diu in personne qui faijot la circulation au d-sus d’ chés nuaches … Chés cloches alles zétotent arvénues mais Ch’ pétit Jésus , li, i’ avot disparu dé s’ croix ! I’ étot sûremint parti à Rome à sin tour … A l’église, y’ avot un monde fou et des fos, minme des gins qui restotent déhors à l’ intrée, avec chés portes laissées grandes ouvertes, qu’y avot pus assez d’plache à l’intérieur. L’ communion cha prénot un bon bout d’ temps, l’ temps qu’ tout l’ monde i seuche allé goûter au « corps du Christ ». Quand in sortot d’ là, chétot la fête ; tout le monde i étot contint ; jé n’sais pas si chétot à cause d’ Jésus qui étot ressuscité, ou si chés gins i zétotent contints d’ s’ artrouver, in tout cas, l’ rue Charles Marlard alle étot bien imbouteillée et chés z’autos alles pouvotent minme pus passer.
In rintrant, in passot devant chés vitrines d’chés boulangeries pâtisseries qui s’ avotent mis sur leu 31 pour l’occasion : Thersen rue Cadot, Hurquin au cercle, Boucly rue Alfred Leroy, … Des poules, des pouchins, et des cloches in chocolat plein l’vitrine. Chés cloches alles z’étotent suspindues in l’air avec des ailes par des fils et chés prix i volotent haut eux aussi ! Alors in s’ contintot d’ les raviser …
Rintrés à l’ baraque, fallot trouver chés zoeufs qu’ chés cloches, in arvénant d’ Rome, alles zavotent laissé quère dins chés gardins ; alors in s’ dépéchot d’ ouvrir l’ barrière au fond dé l’ cour, d’ monter chés marches pour arriver dins l’allée et cacher tout partout. Y’avot gramint d’ jeaunnes qui cachotent à zoeufs comme cha dins leu gardin ; trois quate maisons pus bas, j’ véyos min camaratte Jojo ; j’ y crios : « alors té n’as trouvé ? » « nan, pas cor, et ti ? » « bin, nan, mi non pus ; chés cloches alles sont pétête pas passées par ichi … ». Finalemint si, alles zétotent bien passées, mais cha devot ête des vicieusses : chés zoeufs, i zétotent bien muchés in d’ sous d’ chés choux, dins l’ poubelle, dins chés cabanes à lapin et minme dins ch’ poulailler !...
Arvénus dins l’ cuisine, qu’in n’avot plein ses mains et ses poches, in étalot tout chu qu’in avot trouvé su l’ tabe in formica ; et j’ partageos avec mes frères ; « pourquoi qu’ té prinds cor l’ plus grosse poule? t’as déjà l’ grosse cloche là ! » ; chétot des disputes à n’in pus finir. Finalemint, mémère alle arrivot avec des paquets rimplis d’œufs et alle faijot l’ distribution. Pis des œufs in chuque aussi avec dé l’ liqueur au mitan, qui faijotent mau à ses dints quand in croquot d’ dins…In les mingeot pas trop chux-là, chétot plutôt pour rimplir chés poules pondeuses in plastique avec. « Bin, dù qu’alle est l’ poule pondeusse ? chés cloches i l’ ont oubliée ? ». J’avos biau cacher tout partout, demander à z’uns et à z’ autes, pas d’ poule pondeusse l’ fos chi. Alors mémère alle m’ donnot des sous pour aller n’acater eune à mont Boucly, qu’ jé n’avos vues plein l’ vitrine.
Chés poules pondeusses, alles zétotent jaunes, in plastique ; in z’ artournot pour les rimplir avec chés pétits zoeufs in chuque, pis in l’ mettot sur ses pattes et à chaque fos qu’in appoyot sur sin dos, ses ailes alles se soulevotent et alle pondot un œuf !
In pouvot juer des heures avec cha, des jours et des semaines ; souvint chétot l’ seul vestiche qui restot d’ Pâques, eune fos qu’in avot boulotté tous chés sujets in chocolat, avec eune paire d’œufs in chuque pou l’ poule pondeusse bien sûr, qu’in devot surtout pas y toucher ; mais finalemint, i in restot toudis un viux paquet quéque part au fond d’eune armoire.
In passot ses vacances d’ Pâques à minger comme cha du chocolat ; heureusemint qu’ cha durot pas trop longtemps et qu’ l’ école alle arvénot vite ; d’autant qu’ chétot l’ 3ième trimestre, l’ pus long, l’ pus dur, ch’ti qui allot décider si in passot ou pas dins l’ classe supérieure ; alors chétot pas l’ momint d’ attraper eune crise de foie ou eune indigestion !
Finalemint chétot bien aussi Pâques ; Noël aussi ; pis Saint Nicolas. In n’avot pas misère. Le temps i s’écoulot duchemint, sans accroc. Eune fos passé Pâques, cha comminchot à sintir l’été pis chés grandes vacances ; l’pistache alle allot bétôt rouvrir ; ch’ camp i m’attindot à bras ouverts ; chés papillons i zallotent commincher à sortir d’ leur cocon ; et mémère alle étot déjà prête pour aller in escursion au Mont Noir. Tout i’ étot réglé comme du papier à musique.