El berquer au grand coeur

Ch’étot l’nuit d’Noë : eune nuit calme , paisipe et drôlmint fin étoilée.
Un berquer au grand coeur s’émerveillait d’el belté d’chelle nuit. I n’avot vu des chintaines comme chelle-là mais chelle-chi, alle simblot bin mystérieusse.

D’un cop, i vit ches ciux s’illeuminer et un anche se déchinde dvant li. I fut saisi mais l’anche li dit : « N’aie pas peur ! Réjouis-toi ! Car cette nuit, dans la ville de Bethléem, est né un sauveur... »
L’anche moutra au berquer commint s’rinde à l’ crèche.

Tout à l’foufielle par l’nouvielle, l’homme n’arpassa pas à s’mason mais s’mit in route pou Bethléem. In chemin, i rincontra un homme mort ed frod. « Mon ami, vous me semblez avoir bien froid. » Alors, i li offrit sin mantiau et arprit sin qumin.

Un tit peu plu tàrd, i vit un jonne qui ramassait des dattes. I avot fait eun sacrée cueillette mais i n’ savot commint conténir tout ses fruits. « Je crois pouvoir vous aider mon jeune ami, voici mon chapeau. »

Puis à l’intrée d’Bethléem, i vit un pauvre brimbeux qui avot tout l’air d’ête dins eune grande misère. I sortit de s’tasse, l’seul doupe qu’i avot et li in fit cadiau.

Un peu plu lon, i rincontra un vieillard qui téguot (peinait) à marcher. « Voici ma canne mon brave, elle vous aidera à vous déplacer. » Puis après, i arriva à l’étabe.

Là, i y avot tout eune palanquée d’gins qui avotent apporté eune séquo  : du lait, du pain, du tissu, d’el vaisselle, ... « Mince, se dit-il, je n’ai pas pensé au cadeau ! » Eus casaque, sin capiau, s’canne et sin iard et même eune pognie d’dattes aurot pu faire eune bielle bistoque (présent) mais asteur, i bourlot trop court (il n’avit rien).

Marie l’ ravisot. Alle simblot lire dins sin busiache (pensée). Alors, alle s’approcha d’li et aveuc fiate (confiance), alle mit l’infant dins ses bras. Par sin grand coeur, ch’t homme avot gâté Jésus et asteur, i archuvot el plu biau des armerciemints : chti de porter el roi des rois.

Gabriez Caux
Banque chtimi