''l dernière Ste Barbe''
par roger le, 04/12/2005"Nous v'la donc quand meme arrivés au bout ed'nos peines.
Et cha a passé tell'mint vite que j'ai l'impression.
Qu'ch'est hier que j'ai comminché à Germaine.
Eun'talle sans pindage avec un moteur à piston.
Et v'la qu' ch'est fini de s'réveiller d'bonne heure.
Ou sitot l'vés, in buvot sin café, à mitant indormis.
Avant d' s'in aller par n'importe que temps et à l'heure.
Artrouver nos camarates de l'même compagnie.
Et ch'est ainsi qu'après eun' longue vie ed'labeur.
Ou chaque année passé, jour après jour, au fond,
A gravé sur not'visage, tout autant ed'sillons,
Ou chaque poste valot sin pesant ed' sueur.
Nous v'la d'un cop, d'vant eun' nouvelle vie.
Cha fait tout drole, comme eun' bistoulle sans eau d'vie!
Finies chez heures ed' rabiot qu'un faisot d'après midi.
Quand y fallot foncer chés stots et canger, chés couloirs,
In r'montot que d'fois bin après l'tombée d'el nuit.
Dieu, qu' ch'étot bon ed' boire eun' canette, tout noirs!
Fini d'attindre qu'ed'fos eun' heure dins ch'couloir.
Que ch'mait et l'ingénieur y z'décident enfin,
A nous faire passer not' rapport et nous cacher des histoires.
Comme si ch'étot d'not' faute si l'talle al'étot dins l'brin,
Finis chés exercices ed' tir à Lens ou ch'lautocar
Comme, dins l'temps, sin baudet à Cafougnette,
S'arrêtot souvint, au'r'tour, d'vant eun' guinguette,
Ou ch'l'ingénieur payot un verre au lieu d'nous passer un cigare.
Finies les sorties ed'Ste Barbe quand in partot au matin.
Avec un moral ed' fer et avec des sous dins ses poches.
Et qu'in' r'venot, qued'fos l'lend'main, cha ch'tot moche,
Avec des dettes et un vélo qui zigzaguot dins nos mains,
Et l'pire ch'est qu'in s'ra toudis dins les gampes de s'femme.
Et qu'après avoir été chef pus d'vingt chinq ans au fond.
Va falloir qu'in s'habitue, et cha s'ra sur'mint un drame,
A l'vir' comminder, comme nous, quand in étot porion!"
Jacques HUET