la femme du coulonneux

LA FEMME D'UN COULONNEUX
chanson d’Alexandre Desrousseaux

Hier j'ai rincontré m’commère,
l'femme à Séraphin,
Ell' réjoui' d'ordinaire,
avot l'air chagrin;
Surpris J' l'arrète au pus vite,
pour mi savoir chin qu’elle a,
tout aussitôt l' pauv' petite dit:
J' vas vous raconter cha
Et vous l' direz.., j'espère ,
compère,
Que l’ femme d’un coulonneux
a l’ sort bien malheureux

Séraphin étot l' modèle
Du brave homm' marié,
Donnant chaq' jour à s'n Adèle,
Des preuv's d'amitié.
Pinsez si j'ai l' coeur à rire !
Tout d'un cop, ch' roi des chochons
A porté, j' rougis de l' dire,
Tout s'n amour su' des coulons.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

I les baje, i les cajole,
Leu parle tout l' temps,
Jugez, compèr', si ch'est drôle,
Mieux qu'à des infants.
Ah ! vrairnint, m' peine est estrême !
Vous comprindrez min dépit
Les mots qu'i dot dire à s' femme,
Ch'est à chés biêt's qu'i les dit.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

Quand ses coulons sont malades,
Faut vir sin chagrin !
Pus d' cabaret, pus d' prom'nades,
I n'a mêm' pus faim.
A chés coulons, tant qu' cha dure,
I donn' les soins d'un ami...
Si j' viens malad', j'in sus sûre,
I n'in f'ra point tant pour mi.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

Il in perd souvint tros quate.
Cha l 'attriste, mais
Cha n' fait rien, il in racate ;
I ne r'cule jamais.
Ch' n'est point pou' rien qu' je m' dépite.
Quand j' dis, lass' de l' vir souffrir
« Mais, vinds tes coulons bien vite ! »
I m' répond : « J’aim' mieux morir ! »
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

Incor s'il avot de l' chance !
Mais, dins les concours,
Quoiq' toudis plein d'espérance.
Tout li tourne à rebours.
Souvint l' coulon reste in route.
On n' sait point par queul hasard.
Et s'il arriv' qu'i rabroute,
Cha n' manq' point: il est in r'tard.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

Il a détruit (biau mérite !)
Les cats du quartier.
Pour n'avoir point leu visite
Dins sin coulombier.
V'là chin qu'a produit ch' l’ ouvrache,
Qui n'a ni rim' ni raison
Les soris d' tout l' voisinache
Sont v'nu's nicher dins m' mason.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.

Ah ! t'nez cha cess' d'êt' cocasse !
Eun' pareil' passion,
Pour des coulons, cha dépasse,
D'êt' sot, l' permission.
Au bon sins, ch'est eune intorse.
Heureus'mint qu'i vient d' passer
Eun' loi qui permet l' divorce...
On n' porra point ni' le r'fuser.
Ah! vous l' direz, j'espère,
Compère, (bis)
Que l' femm' d'un coulonneux
A l' sort bien malheureux.