le vieux cabaret
par bourdonb le, 11/01/2006LE VIEUX CABARET
d'Alexandre Desrousseaux
On n'fra bétôt pus d'différeince,
Intre l'café, l'estaminet;
Eun' cantin', même, à l'appareince,
Peut passer pour un cabaret.
Aussi, j'vas vous r'tracer l'modèle,
D'un vieux cabaret d'no' pays,
Certain, si vous prétez l'orelle,
Qû vous direz comm' mi, mes amis :
V'là, trait pour trait,
L'portrait
Du vieux cabaret
Du vieux cabaret
Et d'abord, veyons l' devanture
Elle est barbouillée au p'tit-blanc.
Mais l' bois'ri', pour mieux fair' figure,
Est peinte à l'huile, in vert brillant.
A l' porte vitrée, à l' ferniête,
(On n'in veyot point d'aut's dins 1' temps),
Vettiez chés rideaux d' cotonnette,
A grands carreaux rouch'-brique et blanc.
V'là, trait pour trait,
L'portrait
Du vieux cabaret
Du vieux cabaret
Introns-y. Veyons l' tapiss'rie
I' vous s'ra permis d'in douter,
Mais ch'est l'ancienn' guerr' d'Italie
Qu'on a prétendu r'présinter.
Ch'est sûr, car malgré qu'on y colle,
A chaque usure, un p'tit tassiau,
On découvre su' l' pont d'Arcole
Bonaparte avec sin drapeau.
V'là, trait pour trait,
L'portrait
Du vieux cabaret
Du vieux cabaret
Mais quittez, des yeux, l' pont d'Arcole,
Au plafond, min dogt vous conduit,
Pour vettier, dins s' petit' guéole,
Un canarien qui s' réjouit.
In acoutant canter cheull' biête,
Surtout n'obliez point l' pus biau
Che p'tit Bacchu', avé s' gross' tiête
Assis grav'mint sur un tonniau.
V'là, trait pour trait,
L'portrait
Du vieux cabaret
Du vieux cabaret
Après cha, j' peux vous l' dir' sans craintes,
Vous pourmir'rez comme mi, mes gins,
Tous chés pots, chés canett's, chés pintes,
Si prop's qu'on vot sin portrait d'dins.
Vous r'marqu'rez, surtout, chés vaclettes
Nuit et jour rimpli's d'un bon fu,
Et, pour débourrer les pipettes,
Che p'tit clo, à l' porte, peindu.
V'là, trait pour trait,
L'portrait
Du vieux cabaret
Du vieux cabaret
Mais l' leumièr' n'est point d' chés pus bielles ?...
A cha, je n' vous dirai qu' deux mots
Vettiez, d'ichi, chés tros candelles,
Brûlant dins des grands cand'lés d' bos.
Vous verrez, sans mett' des leunettes,
Quand eun' candelle a l' nez trop long,
Qu'on fait, d' ses dogts, des émouquettes,
Pour li coper sans pus d' façon.
V'là, trait pour trait,
L'portrait
Du vieux cabaret
Du vieux cabaret
Allez-y dins l' coeur de l' semaine,
Vous n'y verrez qu' des habitués.
On in compte, au puque, eun' douzaine,
In deux sociétés, séparés.
Avé l' mêm' plaisi, l' même ardeur,
Tout du long d' l'ainnée, à l' mêm' plache,
Les six premiers jutt'nt au Mariache,
Et les aute' au Piquet-voleur..
V'là, trait pour trait,
L'portrait
Du vieux cabaret
Du vieux cabaret
Au mitan d'eusse, l' cabar'tière,
Est eun' poule avec ses pouchins.
Connaichant l' fond d' leu caractère,
Ell' les accable d' ses p'tits soins.
Dins l'hiver, ell' cuit des puns-d'-tierre
Et les offre à tout un chacun.
Pa' ch' moyen, comm' cha les altère,
Ell' vind deux pots d' bière au lieu d'un.
V'là, trait pour trait,
L'portrait
Du vieux cabaret
Du vieux cabaret
Ch'est aut' coss', les dimanche' et fiêtes,
Autour de çhés grand's table', assis,
Vous n' verrez, buvant leus canettes,
Qu' des gin' à visach's réjouis.
D'un grand coeur les inteindant rire.
Pa' l' jus d' houblon émoustillés.
Vous n' porrez vous impêcher d' dire
Qu'on trouve l' bonheur à peu d' frais.
V'là, trait pour trait,
L'portrait
Du vieux cabaret
Du vieux cabaret