Les jardinsvive sainte Barbe
par bourdonb le, 25/02/2006VIVE SAINTE-BARBE
de Jules Mousseron
I
Ch'est l' Saint'Barbe aujord'hui.
Pour nous, ch'est eun' grand'fiête.
I faut prindr' du plaisi,
Nous l' trouv'rons dins l' canette.
In peut bin s'amuser
Après si dur' quinzaine !
Mais n' parlons pus dé l' peine ;
I faut boire et canter.
REFRAIN
Rions à s' fouler l' rate
Et dansons, comarates !
Ahue ! ahu' ! faut casser nos chabots,
Et les mettre in mill' morciaux !
Viv' Saint' Barb', comarates !
Ahue ! ahu' ! faut casser nos chabots,
Et les mettre in mill' morciaux !
Gar' les boursiaux !
Buvons, cantons, amusons-nous !
Amis, d' rire in n' dot point êtr' mate !
Buvons, cantons, amusons-nous
Mettons les tonniaux sens sus d'sous.
II
In a, dins ç' jour si biau,
Des doup's tout plein ses poches.
Ch'est l' jour qu'in met s' capiau
Bin haut pou qu'in nous voche.
Nous avons eu l' bouquet
Deux-tros mètres d' saucisse,
Du vin, del friandise...
In peut faire et banquet !
III
A l' mess' nous s'in irons
In suivant la musique.
D'pus d'un communieront
Avec et « copernicke » !
No bon curé prêchant,
I n' manqu'ra point d' nous dire
« J' sus bin contint d' vous vire ;
In v'là cor pour un an ! »
IV
T't à l'heure au soir, au bal,
Les vieux comm' les pus jonnes
S'in donn'ront un régal
A fair' kair leus marronnes !
In dans'ra t' qu'à bin tard,
Quand les jonn's gins, à l'aise,
I s' fais'ront l' dernièr' baise
Cha s'ra l' dernier pétard !
