Les jardinsl'chique à chouchou
par klavzer jean marie le, 21/03/2006L’chique à chouchou
L’grand Fernand, qu’in appelot chouchou l’chiqueux, i passot pas inaperchu dins l’rue. Chaque fos qui pouvot i s’ténot d’vant s’porte, ajouqué su s’pierre à miler si i avot pas un homme in vue. Pourquoi justemint un homme? Tout simplemint pace que dins l’rue, chouchou i avot pus d’chance de trouver un homme avec du toubake dins s’poche qu’unne femme.
Gare a ch’ti qui tirot su un tiot mégot. Aussi sec chouchou i débitot sin spitche « commint qui va ch’t’homme »? Ch’étot r’parti su l’timps, su chés gardins in r’tard (i faisot pas l’sien), i bavot surtout su l’voisinache.
A forche l’aute i jetot sin mégot et i finichot par tirer sin paquet d’gris de s’poche… Ch’Fernand i lachot sin plus biau couplet « Ben brin alors! M’chique ale a pu d’gôut et i a pu qu’des buques dins min paquet » Et tout cha avec un air d’avoir perdu s’quinzaine, i fallot vir cha mes gins.
A forche, ech coulomb, unne fos su deux, i tindot sin paquet, chouchou i plongeot ses dogts n’dins, artirant d’quoi chiquer tout un poste, pou infourner cha dins s’bouque. Tout in armerciant i invoïot un jus d’chique à brisier chés pavés cha guilot su sin menton. Du reste, un jour min grand père i m’a dit « te vos min fiu ch’pavé findu d’un ch’rucheau, ché chouchou qui l’a brisier comme cha, un jour qu’i avot pris trop d’touback », mi nikdoule ej l’ai cru.
Chouchou i a ravalé ch’chique ed’pis longtimps, ch’rucheau à’ch’t’heure ché du chimint, mais quand ej passe d’vint s’maison, j’attin unne voix qui dit « Brin, m’chique ale a pu d’goût ».
