Cangemint d'heure
par Ch'Zio le, 26/03/2006Aujourd'hui in passe à l'heure d'été et in peut lire tout partout dins ches gazettes que c'est eine "innovation" qui date de 1976, in vue ed faire des économies d'énergie.
Tout cha ch'est des carabistoulles car el cangemint d'heure été-hiver i existot déjà avant l'guerre 39-45.
In ch'temps là les grandes vacance i s'étotes du 31 juillet au 30 septembre et l'cangemint d'heure i avot lieu el dernier diminche ed septembre. La rentrée des classes ch'étot el 1° octobre et, comme à l'E.P.S. ed Bruay in avot étude jusqu'à 7 heures du soir, je m'souviens que, dès l'comminchemint ed l'école, in rintrot à s'maison alors qui faijot dejà noir.
Ch'est pindant l'occupation que ches allemands i s'ont supprimé l'cangemint d'heure :
i voulottent avoir l'même heure dins toute l'Europe et i nous ont imposé l'heure solaire plus deux. Mais ches ceinsiers i s'ont toudis fait d'el résistance et i s'ont gardé l'heure du solel pour la traite des vaques et pour leus ouvraches. Et quand in d'mandot l'heure au villache, i fallot bien préciser ed quelle heure i s'agissot car ches horloches i s'étotent toudis à l'heure du solel !