Des larmes eud gosse
par klavzer jean marie le, 07/04/2006Ed'pis unne semaine el'frodure ale étot là, même que chés cornalles is avote el trannette. Man, aveuc unne pallée d'gaillètes eud timps in timps, ale n'arrivot même pus à récauffer chele maison. Ech mercredi là, cha s'inrringeot pon, même que ches daches eud mes galoches is fesotte des claquettes su l'tierre ingélée. L'pus pire, ch'étot ches dogts et ches génoux surtout, pace que in carante neuf, ches lonques maronnes pou ches garchons, is s'arrêtotte par-d'zeur ches génoux.
Tout l'jour j' zieuto l'ferniette pos vir si l'timps i tournot pon à l'neiche, ch' maîte i m'a invoyé printe l'air.
In sortant eud l'école cha comminchot à querre tout douch'mint,
Ches flocons pos à l'presse eud blankir el tière. L'timps eud rintrer à m' mason, in trinnant bin sur, is avotte fait des jonnes.
Man trouvot drôle qu'em tartine eud castonate restot su l'tape, "té lambines, j'va printe ete timpérature, moutre chi tin front!" . Mi j'éto d'jà in route à faire un bonhomme eud neiche dins m'tiête.
Au soir, pa qui d'vot printe sin poste eud nuit, s'demindot commint qu'i allot faire pace que ché pus unne paire de flocons, mais deus pugnies d'pouches eud neiche qu'i avot dins l'rue. Pou finir i est parti à pieds.
D'pus in pus arv'leux, ej su alé m'couquer in oubliant m'brique caute pou récauffer mes draps. Quand ej su queut indormi cha été pou rêver d'un bonhomme si grand qu'un arbe à chériches, sin nez i étot si gros qu'un pain tros lifes et sin capiaux ch'étot unne boulleusse numéro sis. Seulemint min rêfe ch'est d'venu un cauchemar, ech bonhomme i a ballé su mi, j'éto racoufté comme unne chique. Au momint ù qu' ej commincho à m'énoquer, ej me su réveillé. Comme cha claquot su chés carreaux j'a arvétié à l'fernête, i pleuvot à drache, l'neiche ale avot sin cul lavé, pu rin!!
Ej su artourné dins min lit et ja brai à fréquir ches draps. Pou m'armonter l'moral, man ale disot braie tiot, ch'est autant que t'picheras pon.