Les diminches ed sortie

J'ai déjà raconté qu'à l'Ecole Normale in n'sortot qu'in diminche sur deux et qu'in avot faim. Alors, les diminches ed sortie, j'allos cacher à ravitaillemint, min pére, affaibli par el silicose, n'étant pus in état d'faire des kilomètres à vélo.

El zone qui donnot les meilleus résultats, ch'étot les fermes du Ternois. J'arrivos à ram'ner dix ou vingt kilos d'blé ( in avot ein p'tit moulin à main pour el moute et
in faijot du pain complet ), des fruits d'saison, des œufs et, ches diminches ed chance, eine pièche ed lard ou eine demi-livre ed beurre.

Mais l'problème ch'étot les gendarmes qui considérotent que ch'étot du marché noir et qui confisquotent nou ravitaillemint si in s'faisot printe. Heureusemint i avot eine grande solidarité et ches patroules ed'gendarmes al z'étotes toudis signalées par cheux qui vénotent dins l'aut sins.

Les deux points noirs, du qu'i avot des gendarmeries, ch'étot Saint Pol sur Ternoise et Pernes. Saint Pol i avot pas moyen d'el contouner. Ed plus, intre Saint Pol et Brias, in longeot un aérodrome allemand, bordé de fausses villas, du qui muchottes leus avions d'chasse Messerchmidt. I avot donc gramint ed patroules allemandes et ch'étot pas mieux qu'les gendarmes français.

Alors j'avos cugi ed passer par Pernes : el gendarmerie al étot moins grosse qu'à Saint Pol et j'avos trouvé des p'tits qu'mins pour contourner el ville. Mais l'pire qui m'est arrivé ch'est d'croiser un convois ed tanks allemands. J'avos pas fait attintion qui z'étotent larges et occupotent toute el route.. Al dernière minute, pour pas m'faire accrocher, j'ai du m'jéter sus l'bas côté du qu'min, du qu'j'ai été arrêté par un tas d'caïaux. Mais min vélo i étot viux et fort querquè avec un sac ed blé et ch'cadre i a cassé net au niveau d'el fourche avant. Alors j'ai du rintrer à pied à Bruay, in poussant c'qui restot d'ech vélo.