Les jardinspourquoi in garde des chosses et pas d'autes
par Marie-Claire le, 16/04/2006j' viens d'artreuver eune facture d' 1918 in parfait état, chétot des belles factures d'ailleurs
eune facture d' machine à coude Singer
Em grand mère ale avot à peine 18 ans et ale apprenot l' couture, ale a d'ailleurs été couturière toute s' vie, à sin compte non déclarée ... comme cha s' féjot à l'époque
Dins chés corons ale féjot des vêtements, du raccomodache et ale manquot pas d' clients, pouvez m' croire
alors l' machine à coude d' ses 18 ans ale avot été bien amortie, passequ'ale n'a jamais eu d'autes
et j' vas vous dire que l' machine j' l'a toudis à m' mason, même si j' m' in sers pas bien sur, j'sais qu' ale marche toudis
in s'in sert pus surtout passque chés machines là cha féjot que l' point droit tout simpe
ché eune machine avec ch' pied in fer forgé, l' pédale bien sur et le haut qu' in arceuffe d' un couverque in bos
j' vos core em grand mère pédaler, fallot core avoir l' habitute pour treuver l' bon rythme
et j' em souviens aussi qu'pus d' 50 ans après l'achat, à Enquin y avot toudis un r'présintant Singer qui passot ptete un cop par an pour vire si y avot des révisions à faire ale machine, ben cha ché du service après vente ...
l' machine ale a fait d' l'usage, ale a traversé l' sièque et l' facture avec, que j' vous mets in photo
in n'a un sacré paquet d' factures pourtant dins eune vie mais i n'a qu'in conserfe plus précieus'mint qu' d'autes, qui arprésentent plus d' chosses
NB: 210 francs d' 1918 cha fait inviron 300 euros aujourd' hui
( 1 photos)
