à Vireux de Annie D-Pailliot
par annie62110 le, 19/04/2006Ch't'année là pindant les vacances ed'paques mémère al a décidé qu'in allo à Vireux . Ché d'là qu'y est min grand père, cha s'trouve din les Ardennes . Pour mi ché l'premier coup que j'prins ch'train à 7ans ché eune aventure. Arrivés là bas, j'sus tout depaysée ché biau ché vert et la meuse al est immense, de plus mémère al est acceuillie comme eune reine, mi aussi, pourtant j'les connos pas.
Les tantes Charlotte et Emma al sont d'eune gentillesse! Al tiennent un café in face d' l'eglise ed Vireux, à tous ché gins al me presintent comme l'tiote fille du poney, cha ! Cha m'semble curieux, j'saurai plus tard que cheto l'surnom d'min grand'père. In rindant visite à eune nièce à mémère in traverse la meuse, ch'pont y est tout blanc in diro qu'y a neige, ché les éphémères qui sont mortes pindant l'nuit in appelle cha la mouche de mai y'in a des milliers.
Arrivés amo d'ché gins, l'première chose que j'vos ché eune photo d'mi à 18 mos au milieu d'ch buffet d'salle à manger (comme y zont jamais eu d'infant j'ai du passer m'vie sur ch'buffet) Y sont tellemin contins d'm'vire qui savent pas quoi faire pour mi cheto vraimin des braves gins.
J'm'souviens de tiotes boules à visser rimplis d'parfum crème, chelle au mimosa j'ai du in trainer l'parfum pindant in momin. In réalité pendant eune semaine j'ai decouvert de l'famille formidable. El pélérine rouge qu'Emma m'avo tricotée j'l'adoro, j'l' ai gardée longtemps.
Cha a été dur d'r'partir. A ch't'heure y do pu y avoir grand monde, el sidérurgie in fermant al n'a fait émigrer gramin, mais in tout cas mi j'sais que j'sus à moitié d'là bas .