viens tiot, viens...JMK

Viens tiot, viens

Min mouron i a comminché alors qu’ej devos avoir dich ans. Nou nouvieau visin, i n’allot pos arlander pou mette el broulle dins mes habitutes ed gosse.
Ben vite, André, ché comme cha qu’in l’appellot, i a ourdé unne baraque in bos, in plein mitan ed sin gardin, pou y mette des coulons. El pus biau, is volotte à l’cour, mi qu’j’éto habitué à vir cheux d’pa, déhutter du coulombié pou baller dins l’castrole, j’in croïos pos mes z’yux.
Tous les jours j’attindos « viens tiot, viens ». A’s’t’heure ej sro parti in cueurant drot d’vant sans m’artourner, surtout qu’in pus i avot comme un bruit d‘chuques aloté, dins unne boite in fier! Pa i m’a expliqué qu’ch’étot André qui attirot ses coulons avec du maïs pou les faire rintrer.
Pus tard ches jonnes d’el rue is ont compris qu’cha n’sro pus comme avant, surtout l’diminche matin jour ed concours pou chés coulonneus; rin qu’dins l’rue, on in comptot tros!
Du cop pus moïen d’crier, d’juer au cherke, ni aux roulemints à biles. Même ches grands is pouvotte pos juer à l’guise, cha impêchot, sot disant, ches coulons d’rintrer… Nous coulonneus i s’étranglotte ed rache in voïant leux champions juer su l’trappe pos à l’ presse « viens tiot, viens »…… Ben sur ches menaces is pleuvotte « J’vas l’dire à tin père, te l’fais exprès pou nous amarvoïer. Pa trouvot cha un tiot peu exagéré, vos pinsez li qui juot d’el grosse caisse, i disot avec un sourire ed coin « ches des nunuts- tatasses, si cha continue in pourra pus péter l’diminche »!
Cha n’impêchot pos nous coulonneus d’porter leux constateurs au sièche et ben souvint, d’arvénir avec unne pronne, vir unne bonne dache, quand leu champion i étot arrivé premier. Ch’jour là in intindot pos « viens tiot, viens », ches coulons is rintrotte directemint, et tout seu, dins l’trappe!!!