L'arrivée d'ches allemands à Bruay
par Ch'Zio le, 02/05/2006Un jeudi après midi d'la fin de juin 1940 (je n'sais pus l'date exacte mais ch'étot un jeudi vu qu'j'avos pas école), j'avos besoin d'aller à mon d'ech coiffeur. Min coiffeur ch'étot Bauduin, tout prés du Cercle, dins l'rue nationale (asteure rue Cadot), à côté d'el bijouterie Gourdin.
In v'nant d'el rue d'Picardie, l'pus court quémin ch'étot d'passer par l'rue d'Lorraine et d'traverser l'cour d'el fosse 1.In arrivant à l'intrée d'el fosse, j'ai intindu un bruit métallique continu, qu'j'ai pas arconnu, et je m'demandos bien quo qu'ch'a pouvot être.
Mais, après ch'tournant dins l'cour du 1, in veyot l'rue nationale et ch'a m'a donné l'solution.
I avot eine colonne ininterrompue d'chars et d'automitrailleuses montées par des soldats habillés in vert qui passot su l'route in v'nant d'el direction d'Béthune. L'bruit qu'j'intindos ch'étot ch'ti des chenilles métalliques ed ches tanks.
A quinze ans, j'ai dû dev'nir à peu prés aussi vert que ches uniformes que j'avos vus et j'ai vite armonté à longues gambes el cour du 1, pour aller raconter cha à mes parints.