El lessive in 1930
par Ch' Zio le, 27/05/2006In complémint à ches articles déjà parus dins l'rubrique " lessive ", j'voudros raconter mes souvenirs d'el lessive comme al s'faijot à m'maison dins les années 1930-1940.
L'instrumint principal ch'étot l'lessiveuse, incore appelée "bouilleuse" (Photo 1). Al avot un tube injecteur central, vertical, in forme ed champignon, raccordé à un double fond
perforé. In l'faijot cauffer su l'cuisinière à carbon, l'iau savonneuse al s'mettot à bouillir et, par convection al montot dins ch'tube et l'champignon aspergeot ch'linge. Cha
suffigeot pour bien laver ch'linge ed maison mais pas pou ches cols et poignets ed quémiches, ni pou ches loques ed fosse.
Alors in sortot l'planque à laver (Photo 2), in bos ou in tôle galvanisée ondulée, et in frottot avec un savon d'Marselle et eine brosse ed chiendent.
Un premier progrés cha a été l'arrivée des batteuses manuelles: eine cuve in bos sur pieds avec un couvercle qui avot in d'zous un axe avec des palettes pour agiter ch'linge et au d'zeur des leviers avec des poignées auxquelles i fallot donner in mouvemint ed va et vient. Pour avoir quéquefos aidé m'mère, j'peux dire que ch'étot fort fatigant.
Pis, grosse amélioration, in a eu eine batteuse électrique (Photo 3), du qu'ches palettes étotent reliées à un mécanisme à ingrenages, mu par un volant et eine courroie, intraînée par un moteur électrique.
L'essorage s'faijot avec eine essoreuse à rouleaux (Photo 4). Ch'étot bien pou ch'linge plat mais m'mère n's'in servot pas pour les otes pièches car cha cassot les boutons.
In ch'temps là el lessive ch'étot quand même eine sacrée corvée, surtout avec ches loques ed fosse qu'min père i ramenot tous les jours. Ch'étot pas non pus sans danger car i fallot prindre, su l'cuisinière à carbon, el lessiveuse pleine d'iau bouillante et l'vidier dins l'batteuse. D'ailleurs min père, avec un pot d'fonte et des briques réfractaires, i avot construit, dins l'buanderie, un fourniau qui étot gramint plus bas qu'chelle cuisinière à carbon et rindot moins pénipe ech transvidache.
Asteure ches batteuses électriques sérotent interdites par ches commissions d'sécurité car i n'i avot aucune protection, ni sur ches ingrenages, ni su l'courroie. In plus ch'moteur asynchrone monophasé n'avot pas d'dispositif ed démarrage à condensateur : i fallot lancer ch'volant, in tournant s'poignée à la main jusqu'à attindre el bonne vitesse, avant d'appuyer su ch'l'interrupteur pour que ch'moteur intraine l'courroie.
( 4 photos)