Les jardinsEl lessive in 1950
par Ch'Zio le, 07/06/2006Ch'est in 1952 que BENDIX mit in vinte ches premières machines à laver automatiques.
Al z'avotent déjà à peu prés l'même allure qu'ches lave-linches à tambour horizontal et hublot qu'in vint asteure (Photo). Al z'étotent équipées d'un programmateur qui inchaînot automatiquemint ches opérations ed trimpache, lavache, rinchache et essorache.
Mais i avot deux grosses différinches avec ches lave-linches d'aujord'hui :
- Ch'tambour i étot pas suspindu et l'machine al devot ête fixée au sol avec deux goujons scellés dins ch'carrelache.
- El cauffage i étot pas incorporé. I avot deux arrivées d'iau : eine d'iau froide et eine d'iau caude qui devot ête fournie par un cumulus à gaz, réglé à 90°C
Plus tard in a incorporé un chauffe-iau à gaz dins ches machines, mais ch'étot pas très solite et cha s'déréglot souvint. Cha n'est que quand l'secteur électrique i est passé in 220 volts qu'in a pu avoir eine puissance assez forte, permettant, comme asteure, un cauffage par résistance électrique.
Eine pétite anecdote : Lors d'el naissance (à domicile) de m'dernière fille, in 1953, al n'étot pas pressée d'sortir et l'nuit paraissot fort longue. Alors, comme j'étos miux équipé que ch'médecin accoucheur, pour passer l'temps in attindant qu'cha vienne, j'i ai fait eine démonstration ed lessive automatique…
( 1 photos)
