la campane dins Bruay

In fait chte mason ale pourro ete en pleine campane du coté d’ Fruges

L’tuile ché del ctn numéro 1 ou alors del ‘ nieurlet ché vrai qu avec min boulot quand que j’ travaillo dinch’ nord j avo été formé par un ancien d’ ché ctn le comptoir tuilier du nord et quand qu on s’ prom’no du coté d’ tourcoing ou roubaix, i poso les questions et j’ devo trouver l’ type ed tuiles que chéto
Bon j' arviens à min sujet , raviser l’ sabliere, ch’ rang d’ briques juste in d’sous del toiture, i a bougé , pouvez et’ sur que l’ toiture ale a été arfaite y a djà un momint mais que l’ mason , située dins l’ vieux bruay ale do avoir eune paire d années chele lale
L’ vieux bruay, chéto juste à coté del lawe, l’ riviere qu ale passe in bas d’ bruay , oh ché eune riviere qu ale parait calme et pourtant , et ché pas qu in ait des glaciers qui fontent dinl’ coin, mais ale a eu d’ sacrées crues pendant des siéques

Ch’ vieux Bruay, incrinqué au fond et sur les premiers coteaux d’ la riviere, un tchiot villache ed cinsiers, i a vu débarquer dans les années 1850 d’ droles d’oziaux , des étringers, faut dire aussi qu ach’ momint là , in avo pas la meme vision , in étringer chéto quéqu un qui éto pas du villache, houdain chéto cor toléré , mais après chéto terra incognita, alors quand qui zont vu débarquer des gins du nord, d’ paris, des géometes qui ont comminché à cacher des zindroits du qu in pourro forer du carbon, i zont ravisés cha d’ un drole d eule, mais i pouvottent pas s’ douter que moins d’ 20 ans après cha comminch’ro à canger l’ paysache à eune vitesse exponentielle …
I zont du avoir el’ meme reflexion qu’ nous , nous qui sommes un peu des nostalgiques ou tout du moins qu in veut pas qu’ les zannées des mines cha passe al’ trappe par l’ oubli, eux quand qui zont vus l’ construction des corons i zont du croire que chéto la fin du monte et qu' in marcho sul’ tiete .....