Les jardinsmaison d'ingénieur 2
par mariegroette le, 10/06/2006Ch'est in arqueillant d'sus l'photo d'Minloute, postée y'a queques jours eq m'arvient un viu souv'nir.
Inch temps là, in vivot in collectivité dins inne grinde bâtisse, trois quate coupes par palier y'avot. Et pas cor l'iau courante, les cabinets y z'étotent déhors, et par deux ringées d'tros face à face.
Fallot faire cauffer d'l'ieau pour prinde sin bain, el sam'di dans inne lessiveusse. In s'cauffot au mazout, cha puo!
Pour c'qui étot du décalage, dins l'cour, in véyot par autzeur ches murs, el grinde mason de ch' l'ingénieur comme in dijot. J' min rappelle, elle étot haute, et toute arnippée ed vine vierche qui grimpo s'qu'in haut. A l'automne les couleurs étotent magnifiques
et in cop comme cha avec min père in s'est payé l'culot d'aller sonner a mon d'chés gins pour ed d'minder si qu'in pouvot avoir queques feulles ed toutes sortes ed couleurs pour les faire arséquir. In a été bin archu, et ch'l'homme, bin aimappe y nous a fait visiter sin catio. In arpartant, tout heureux de l'visite qu'in y avot rindu, et comme li pis s'femme y z'avotent pu d'jonnes à leu mason, y m'a dit que j'pouvos aller juer al balanchoire au fond du parc qui étot derrière.
Ch'étot vraimint l'paradis que d'pouvoir gambader la d'dins mais chaque cop que j'dévos sonner à l'porte pour dire que j'étos là pou juer, j'étos vraimint dins mes tiots souiers!
