Baccalauréat et Kommandantur

In juillet 1944, in a été convoqué au Collège de Béthune pour passer les épreuves du bac.
Tout étot déjà désorganisé et i n'i avot pus d'autobus pour aller à Béthune et in avot peur de s'faire voler nous vélos si in les laissot trois jours dins l'cour du collège. Alors in i est allé à pied (Bruay-Béthune : 9 km) et l'internat du collège a rouvert pour nous prindre in charge.

A la fin de ch'l'examen, in arvénot à quatre, sac au dos, pas l'même quémin, l'route nationale 41. Mais vla qu'in rincontre eine patroulle allemande qui nous prind pou des "terroristes". I n'parlotent pas français, et l'seul d'nous quatre qui avot fait allemand deuxième langue n'arrive pas à leu expliquer nous cas. Alors i nous arménent à l'Kommandantur d'Béthune. Là, ch'l'hauptmann i parlot français et, comme in avot gardé nous convocations au bac,
i vot bin qu'in est pas des "résistants" et i nous laiche arpartir.

Chu qu'in a fait. Mais, trois kilomètres plus loin, in rincontre eine aute patroulle allemande qui n'veut rien intindre et qui nous armène à l'Kommandantur. In nous veyant arvenus, ch'l'hauptmann et ches fridolins d'service i ont eu eine franche rigolade. Ch'capitaine i nous a dit qu'ch'étot pas la peine d'arpartir insonne, parce que, dins deux heures, in s'rot arvénus. Alors i nous a r'laché un par un toutes les demi-heures.

J'sus arvénu par des pétites routes in d'sous d'Hesdigneul, pis j'ai passé par Haillicourt pour argagner l'gare d'Bruay, pis m'maison. Et j'ai pus rincontré d'patroulle.

Malgré toutes ches contrintes d'la guerre in n's'est pas démontés. Bien que ch't'année là ch'est pas à cause du C.P.E. qu'in avot perdu deux mos d'cours, mais à cause des bombardemints d'Béthune qui avotent conduit l'administration à évacuer ch'collège fin avril et à nous faire continuer nos cours par correspondance avec nos professeurs. Mais in voulot s'in sortir et in avot travaillé à mort (i faut dire aussi qu'i n'i avot pas gramint d''distractions à l'époque, chu qui nous a aidés). Ches quatre bruaysiens pris pour des "terroristes" i z'ont eu trois mentions "très bien" et eine mention "bien" à leu bac qui leu z'ont permis d'avoir des bourses et, in octobre 1944, d's'artrouver tous les quatre dins les classes péparatoires aux grandes écoles du Lycée Faidherbe de Lille.