framboises et groseilles
par Marie-Claire le, 17/06/2006pour mi ché un souv'nir des pus agréape l' période d' chés framboises et d' chés groselles
d'abord passeque j'adore chés framboises, alors in in mingeot directemint sur pied mais pas trop quand même passeque chétot réservé ale confiture
quand j'a eu eune mason, j'auros pas pus imaginer d' pas in avoir
et aujourd'hui j' viens d' minger m' première framboise d' l'année, cha m' fait toudis autant plaisir
après cha s'ra l' momint d' faire des confitures, mais faut core attinde un peu
cha m' rappelle quand in féjot cha avec em grand mère, chétot tout un cérémonial
d'abord i fallot pas les laicher trainer, in cueillot l' matin à l' fraiche pour faire el confiture l'après midi
quand in avot cueilli m' grand mère qui étot un tchiot peu maniaque, ale arprennot chés framboises eune par eune, ouais ouais, elle avot l' phobie d' chés tchiots vers blancs qu'in treufe queque fos dins chés framboises, quand ale in véyot un, in étot au courant ale poussot un cri et l' framboise ale apprenot à voler ..
et chés groselles ben fallot les équeuter, cha prind du temps aussi
eh pis y avot comme qui dirot des superstitions, quand el confiture ale étot in route, chétot surveillance rapprochée d' tout ch' ti qui rintrot ale mason, j' vous esplique, chés zommes pas d' problème, mais si chétot eune femme qui pointot sin nez, ale li d'mindot si ale étot pas "dins ses mauvais jours" ... et j' peux vous dire qu' si chétot l'cas ale passot pas l' porte, ale arvénot après que l' confiture ale étot cuite
m' grand mère ale dijot que l' confiture ale prenot pas dins ch' cas là
j' vous mettra après l'arcette d' chés confitures d' framboises et d' groselles d'mémé Chérie (Pulchérie d'sin vrai prénom), que j' fais toudis comme cha
Confiture ed framboises
la confiture de groseilles