C.E.S. Rostand (1)

Mi j’ai pas connu l’CES, mi in bas del rue Chatellerault et de l’rue d’Isbergues j’ai connu à l’plach des camps, des gardins et pi l’décharge, tout in bas del rue Chatellerault i avot in four à chaux et insuite in allant tout droit vers elle rue René Wallart, (l’rue qui déchint des 4 chemins dû qui avot Platteroo ch’père et insuite sin garchon) cha n’étot que des gardins avec aussi del rhubarbe, du sureau etc… I avot aussi inne décharge dû qui métot’nt chés chintes d’chés fus et pi tout l’reste, chés poubelles quoi, cha j’min rappelle, passe mes parints i m’inveyot’nt avec in tamis et inne carette sur ch’tas d’ordures.
I fallot tout artourner (ch’faisot ché boubelles quoi et j’in sus pas mort) et fallot trouver des chintes in d’sous, les passer au tamis et les armonter quand l’carette alle étot plinne au 26 de m’rue Chatellerault, et cha monte quand in est pétit et tout cha pour que min père i fasse des parpaings pour faire ch’garach’. Quand y avot des vièles briques avec cor du chimint d’sus bin in les armontot aussi dins l’carette et in les nettoyot à l’maison avec in « ottiu » (outil) que min père i avot fait, je m’vos cor l’faire d’ailleurs j’ai cor ch’l ottiu. Ch’est in sacré souv’nir ed pu d’50 ans.
Pour chés parpaings min père i avot fait in gabarit pour les faire et insuite in les faisot in mélangeant chés chinnes, du sape, du chimint in faisot in genre d’béton quoi, et in les métot à sécher dins l’voyette de ch’gardin su du papier journal. Insuite bin min père i a fait tout seul not garach’.
Bin vous savez quand i a fallu démolir not’ garach dins l’cour (ch’étot l’dernier dins l’rue) bin cheux qui ont fait l’boulot bin inn’ n’ont eu inne sèque, i z’y arrivot’nt pas, ch’étot du costaud qu’min père i avot fait.
Après tout cha i z’ont fait des garach’ tout in bas del rue, insuite bin i z’ont fait l’CES Rostand là dû que Minloute i a appris à draguer.
Ouais chacun a ses souv’nirs et pour l’minme indrot ch’est pas toudis les minmes.