eune vie
par annie62110 le, 14/07/2006Y'a d'cha deux ans, j'ai été vire em' grand tante Nais pour y poser des questions sur l' famille al avo 90ans et eune sacré memoire, quand al raconto ses yeux bleus y petillotent chéto un réél plaisir ed'l'ecouter
al m'a d'abord parlé de s' n'histoire et aprés d'chelle de s'soeur em' grand'mère.
Mémére al est née in 1895 chéto pas l'meilleur momin pour v'nir au monde, comme sin pére yavo pas jugé utile d'él'ver ses 6 zinfants et qui les zavo abandonnés à 9ans al éto in service din eune ferme, cha ché elle qui me l'a raconté, ch'fermier chéto eune brute al éto souvin battue, et comme y savo qu'al avo peur y l'invoyo souvin tirer de l'iau ach'puits quand l'nuit al tombo, pour elle ché sin pire souv'nir d'infance.
Comme al avo des fréres et qui yavo du travail din les mines, y zont tous quitté l'région d' Saint Omer pour s'installer à Fouquiéres, al est dev'nue trieuse ed'carbon l'travail yéto dur et y comminchotent à sin sortir, mais l'guerre 14 18 al est arrivée et y zont tous évacué din les zardennes à Vireux, et l'famille al a loué ses bras din ché fermes, ché filles al zont fait des ménages et al zont lavé du linge din la Meuse, l'iau al éto si froide qu'al zavotent leurs mains bleues.
Chè là bas qu'mémére al a rin contré min grand'pére et qui se sont mariés.
A la fin d'la guerre y sont tous ar'venus, mais al porto eune nouvelle croix s'n'homme y buvo et yeto souvin mauvais, alors comme al a eu trois garchons al allo souvin faire des ménaches pour les nourrir, min pére qu'al preno avec elle quand il éto tiot m'a raconté qu'sin premier jouet ché eune institutrice qui imployo grand mére qui l'y avo payé, chéto un pigeon in bo qui batto des zailes et qui tiro avec eune fichelle.
comme ses garchons y veillissotent grand père y s'calmo un tiot peu in face d'ses trois gaillards y faiso pu l'poids, mais y restotent tous méfiants, surtout d'puis qui zavotent trouvé eune cartouche ed' dynamite din l'bac à chintes d'el cuisinière, y zont jamais su commin y l'avo eue etant donné qui travaillo au jour a'l'fosse.
Ché garchons y zont fini par s'marier et mi j'su v'nue au monde din l'maison d'mes grands parints tout juste pour calmer grand père din les derniéres zannées de s'vie, quand y'est parti mémére al travaillo toudi, al avo presque 70 ans qu'al travaillo incore, chéto s'raison d'vivre quand al s'est arrétée in n'a eu l'impression qu'al s'éteigno méme s'mémoire al est partie
chéto eune vie ordinaire pour eune certaine époque pas si lointaine!!!