l'repos du diminche
par bourdonb le, 05/08/2006Dûss que j’ travaille, et diminche in s’erposse.
In n’in est point beaucop pus pauv’ pou cha.
I faut r’connaîtr’ tout d’ mêm’ qu’ ch’est eun’
Bonn’ chosse Honneur à ch’ti qui créa ç’ systèm’ là !
Quand in a bin bûché toute eun’ semaine,
R’léver ses reins, ch’ n’est qu’ juss’, faut l’avouer ;
Un jour d’erpos vous r’met d’ huit jours ed peine...
Ah ! qu’i fait bon , l’ diminche, ed s’erposer !
Déjà, l’ sam’di, quand et bésonne est faite,
In goût’ d’avanch’ et biau jour du lind’main.
Mieux qu’ les aut’s fos, in est fier, in marche raite ;
Comm’s dis’nt les vieux, l’ roi n’est pas not’ cousin.
L’ femme all’ s’in sint : d’ bin pus près in l’imbrasse.
All’ sé gard’ bin, cha s’ conçoit, d’arfuser.
Au cou dé s’ pèr’, l’infant aussi s’inlace...
Ah ! qu’i fait bon, l’ diminche, ed s’erposer !
L’ diminch’ matin, l’ champe est illuminée
Des feux du jour, qu’in est incore au lit.
Pusqu’ ch’est permis, in fait l’ grass’ matinée.
Quand in s’ révill’, in est tout ébloui ;
Paresseus’mint, in bâillant, in s’étire,
Pour un momint, in s’ crot fin bin rintier !
In ignor’ l’heure, in n’ veut point aller l’ vire...
Ah ! qu’i fait bon, l’ diminche, ed s’erposer
L’ long del journée, chacun, s’lon s’ goût, s’amuse
L’un va pêquer, l’aute i va d’sus les camps.
Au soir, in met s’ casquette ou s’ démi-buse,
Et l’in s’in va boire et prindr’ du bon temps.
In s’ dévertit sans pinser à l’ouvrache,
Bin intindu, sans trop tard s’amuser.
Brader ç’ biau jour in s’ saoûlant, ch’ s’rot dommache...
Ah ! qu’i fait bon, l’ diminche, et s’erposer !
Que j’ voudros bin qu’ tout à chacun s’arrinche
I n’ dépindrot qu’avoir et volinté
Pou n’ point ouvrer, tant qu’ possipe, et diminche.
Ah ! cha n’ s’rot point un excès d’ liberté !
Cha fait dé l’ pein’ qu’un comarat’ s’esquinte
Quand, comm’ les aut’s, i mérit’ d’arrêter.
Qu’in faich’ plaisir à ch’ti qui n’a pas d’ rinte
I fait si bon, l’ diminche, ed s’erposer !
auteur inconnu