Joyeux Mariache

JOYEUX MARIACHE
chanson de Jules Mousseron

I

Il y-a grand r'mu'-ménache
Aujord'hui dins l' coron,
Et parmi tout l' dallache
In fait buquer l' canon.
Dès l' matin, à l' piquett' du jour,
In sortot d'jà les tart's du four,
Et des femm's à l' joyeuse allure
Su l' cour, allongeot'nt et jonqûre.
Ch'est qu' deux bons infants,
Visins d'pus longtemps,
Su l' consel ed leu maman,
Vont s'unir in leu mariant.
Tout l' coron jubile,
In frotte, in babille.
Les ferniêt's luis'nt comm' plat d'étain
Cheull' dé l' mariée est garni' d' piaux d' lapin !

Refrain

Vive et biau mariache
Qu'in intind dins tous l's alintours.
Les jonn's, les vieux, tous les âches
Braill'nt d'invie à dévénir sourds.
Dins ç' biau jour
Vive et biau mariache !
S' répèt'nt les marieux tour à tour,
In busiant, l'air fin bénache
« Nous v'là d'sus l' route ed l'amour
Tout t' qu'à la fin d' nos jours ! »

II

I faut vir quand et cortèche
S' met in rout' pou partir,
Comm' tout l' monde i s' dépêche
Et s' bouscul' pou mieux vir !
Les coupl's sont raid's comm' des bâtons ;
L's infants frisés comm' des moutons.
Des femm's port'nt des démons d' coiffures
Garni's d'osiaux comme eune haïure.
D's homm's dont les capiaux
Ont servi d' cach'-pots,
Sont fiers, dins leu nue pal'tot,
Qui n'est point là d'êtr' trop tiot.
L' marié, pis s' jonn' femme,
In gants couleur crème,
Ont tout l'air d'avoir à chaqu' main
Un cataplasse ed moll' farin' dé lin.

III

In leu m'tant in mémoire
El ménu du banquet,
Ces gins font des mâchoires
Comm' des lames d' louchet.
I paraît qu'ils ont, comm' festin,
Bouillon, bouilli, pore', lapin,
Et du vin plein eun' démi-tonne
Pour arroser l' gross' tarte à prones.
Et comme in rira
Quand un drôle ira
Prindr' sous l' tabl', sans imbarras,
L' jonn' femm' marié' pa ses bas !
Pis, moutrant l' gartière
A l' noç' tout intière,
Queu patiau ! tout l' mond' saut'ra d'sus
Pou l' partager comm' del corde ed pindu !

IV

Quand in ara s' panch'lette
Bin rimpli' comme i faut,
Qu' beaucop kairont leu tiête,
Ronflant dins les platiaux,
In ira quèr' l'accordéon,
Pou danser un p'tit rigodon
Et, pou faire avaler l' poussière,
In ouvra plein les grands pots d' bière.
V'là qu'in danse in rond
Les gamb's, les cotrons
Chol'nt au mitan del maison
Les marmit's, les faux chignons.
Veyant cha, l' tiot' femme,
Imm'nant s'n homm' qu'aile aime,
Dit : « Chéri ! comm' j'ai l' cceur contint !
J' cros qu'i rest' cor del pore' pour nous d'main ! »

Refrain

Vive et biau mariache !
Qu'in intind dins tous l's alintours.
Les jonn's, les vieux, tous les âches
Braill'nt d'invi' à devenir sourds
Dins ç' biau jour.
Vive et biau mariache !
Busi'nt les mariés tour à tour,
In s' disant l'air fin bénache
« Partons su l' route ed l'amour
Dûss qu'à la fin d' nos jours ! »