Les jardinsDes marrons qui donnent faim
par Ch'Zio le, 23/08/2006A ch' collège ed Béthune (du qu'al étot arpliée eine demi promotion ed l'Ecole Normale, occupée par ches allemands) i avot eine grande cour avec des biaux marronniers. In octobre 41, i a quéu gramin d'marrons. In s'amusot à les ramasser
et, in soir, in a fait eine batalle ed marrons dins ch'dortoir. Et, comme i avot des boxes, cha claquot dur sur ches parois qui impéchotent aussi ch'pion ed vir cheux qui les jech'totent.
Alors ch'pion s'est mis in colère et i nous a tous collés à nous premier diminche ed sortie. I s'est pas rindu compte que, comme in n'sortot que tous les quinze jours, in allot rester un mos sans artourner à nous maison. Et comme à chaque sortie in ramenot du ravitaillemint, in a resté quinze jours avec nous casiers personnels ed nourriture désespérémint vides et in a eu fort faim.
Six ans pus tard, in arrivant à min premier poste d'enseignant, j'l'ai artrouvé : i avot été muté ed Béthune à Lille, mais i étot toudis pion. Comme à min poste j'étos à un grade supérieur au sien, j'ai pu li dire c'que j'pinsos d'sin comportemint et que je n'li avos jamais pardonné d'avoir eu faim pendant quinze jours parce qu'i n'avot pas réfléchi aux conséquences d'es'punition.
Dins l'photo in vot Ch'Map et Ch'l'Edouard, photographiés par Ch'Zio, dins l'dortoir des secondes, avec ses boxes.
( 1 photos)
