l occupation
par minloute le, 31/08/2006te dire dinl' détail et chronoliqu'mint c'qui s a passé , j' pourro pas teul' dire, pasque j éto jone, 14 ans , et in vivo cha comme cha v'no , cha s appelle l insouciance
nous ch' qui nous imbéto ché jones, chéto d' pas minger comme in auro voulu pasqu in avo d' sacrés appetits, bien qu in a jamais manqué d' minger , mais j' te dis chéto dans la quantité et la variété des r'pas que chéto pas cha
min père i a arcomminché à travailler, i avo un ausweiss pour circuler la nuit vu qui allo al' presse soit tot au matin ou qui i parto tard le soir
j' me souviens que m' mère in rigolant al' le traito d' collabo , ale diso cha quand qu ale avo un coup dinl' nez, et qu' min père li qui éto tout bonasse mais communisse i supporto pas cha
mi in rintrant du traval j' devo m occuper d' mes tchiots frères et meme ed claute, li qui éto né en 1939
ah tiens j' va t in raconter eune bonne aussi, quand qu' min père i avo décidé en 39 d'eum' conduire dans la creusse , tout l' monte i éto déchindu , et m' mère ale a accouché durant ch' voyache , i zétotent à azay ché un tchiot villache, et là m' mère ale a pas miu fait que d accoucher dins eune pieche d un chateau qui avo été réquisitionné pour accueillir ché gins qui comminchotent à quitter la line ed front ou qui cherchottent un peu plus ed tranquilité, et quand que m' mère ale a accouché ale a eu deux garchons, l un chéto michel, l aute claute, mi j' me souviens qui zétotent dans un bercheau , un bercheau d' prince qu' min père i arréto pas d'dire, et min frère michel, li y éto tout rouche et plus gros qu' claute, pourtant y est mort huit jurs plus tard, ouais i parait que ché l' sache femme qu ale porto ché deux infants dans chaque bras, au passache del porte ale auro claqué l' tiete ed michel sur ch' cade del porte et qui s'sro mort, mi j i cro qu à moitié
bon j arviens à l occupation, nan mi j a des souv'nirs , des fashs, des sentimints, souvint en observant mes parints
min père i a vite comminché à acouter radio lontes l' orele collée sur ech poste ed radio , i a eu d' plus en plus ed' restrictions
les juifs té sais, nous in savo pas c' que chéto, ou plutot ouais ché vrai , in dijo ch' marchand là li ché un juif, mais cha avo rin d' péjoratif , et cha m a fait drole ed vire des femmes qui ont du porter plus tard dins l' rue l étoile jaune cousue sur leur vet'mint
nan, nous in a rin su , del déportation , ni cor moins d' l extermination des juifs, in a bin vu eune paire d arrestations, i n a eu eune sur l' plache du qu in habito, j' me souviens cor que chéto des gendarmes francais qui ont fait cha , mais les gins qui ont été arrétés , i s' dém'notent pas, alors nous ins' dijo qui zétotent ptete infreumés dans eune prison ou dans un camp enfin quand qu on dijo un camp chéto rin d' dramatique comme qu on a su aprés la guerre
nous chéto pas évident d acater des produits au marché noir, d abord in roulo pas sur l or, pi i auro fallu connaite du monte en campane, in avo bin cor del famile al' campane mais chéto du coté du havre, donc fallo pas compter pour aller s' ravitailler chez eux
aprés l usine ed biscuit'rie, j a travaillé pas loin dans eune usine ed pain d épice, milliard comme cha chlingo cha, i avo meme des rats qui courottent sur l' pate à peine arfroidi , d' puis ch' temps là teu m' fra pas minger du pain d épiches ché impossipe , cha m' rappelle trop d' souv'nirs
i a eu des gins qui ont collaboré ouais , faut dire qu à saint d'nis, j' me souviens d' min père qui ralo dins sin coin concernant doriot, joseph doriot , communisse eune paire d années avant, maire de saint denis, qui là faiso eune carriere politique à la botte des zal'mands
i avo un surtout qu in s' méfio, i traino toudis dins ché bristrots, et i essayo d ete sympathique avec tout l' monte, j ai cor in tiete sin rire, i avo un grand rire, li in' a balancé du monte, meme qui a dennoncé eune des deux soeurs du coin, i a dit qu ale éto juiffe, chéto pas vrai, mais d' savoir que l'viele femme ale avo été em'né par ché all'mants cha avo arfroidi tout l'monte et chacun faijo guiffe à ch' qui dijo quand qui avo du monte autour, ché murs ont des oreles ale dijo l affiche
nan chéto eune occupation presque normale, simplemint in avo plus d' restrictions, mais chéto supportape
pi aprés cha cha gaté, cha cha gaté pasqui a comminché à avoir des bombard'mints en région parisienne
cha fait un drole ed sintimint quand meme d accepter qu' ché bombes qui tompent et qui peuffent tuer du monte, qui vous mettent en danger, chéto des bombes soit disant amies, balanchées par les zanglais
in les avo pas ker non plus les zanglais, comme les zal'mands pas plus pas pire
que souv'nirs encore de ch t époque, oh m' mere, un vrai sirop d' la rue qu in dijo, j éto à peine arvénue du traval, qu ale dijo, simone occupe te des gosses j va faire un tour, i a des coups ché min père qui rintro avant m' mère pour te dire
donc cha m occupo ché l'moins qu on puisse dire
comme aut' souv'nir, les alertes aériennes, pi aussi l' couv' feu, qui fallo pas que l' leumiere del lampe ale so vu d' dehors
j a arcomminché à travailler al' premiere biscuit'rie, mais j a armarqué tout d'suite que l' qualité des produits chéto pu l' meme chosse, l odeur d ailleurs ale avo cangé au momint del cuisson et pire encore ché gatiaux i zétotent beaucoup moins bons