min collège ed'Fouquières
par Hervé62155 le, 04/09/2006Bon, m’arv’la avec mes vieuz’ries ! L’dernier cop, j’avos parlé d’mes années d’maternelle et d’primaire. J’vas vous parler d’ech collège : j’sus allé au collège d’el rue Pasteur, près d’l’école Condorcet. Ch’étot pas des biaux bâtimints : ch’étot des préfabriqués !
L’hiver, t’avos toudis frod, l’été, té crevos d’caud ! Ch’est p’têt pour cha que j’a point ker el caleur et que j’as toudis caud, même in hiver !
Quant à l’cour, ch’étot del’tierre battue : quand i pleuvot, y’avot des flaques d’iau tout partout ! In aurot dit l’plache ed’Merlimont, in pus sale !!!
A l’époque, j’me rindos pas compte que ch’étot pas biau ; in étot là pour apprinte, in faisot pas vraimint attention à c’qu’y avot autour. In étot aussi plus préoccupés par ché copains et…copines (ch’étot mixte !) (Quoique, quand j’y arpinse, m’dernière année au primaire Condorcet avot dû êt’ mixte aussi).
J’as d’bons souvenirs du collège ; j’y as fait quat’bonnes années. Ché professeurs, i étotent in général bien : y avot M.Bouchez in français et histoire-géo(qui est maire ed’Fouquières depuis longtimps maint’nint) ; Melle Legrand/Mme Lacas, Mme Héribel, in français, M.Fontaine, Mme Gille in latin, M.Bondois, Mme Krukowicz, Melle Carpentier in inglais ; Mme Patou,Melle Caron in allemand M.Ménage, M.Bastin, M.Boczkowski in mathématiques ; M.Pennequin, M.Liégeois in Sciences Naturelles ; y n’avot aussi d’zaut’, cha m’arviendra pus tard. Ch’étot assez convivial ; j’cros qu’in avot tous assez ker d’êt’là, même si, comme achteure, in attindot ché vacances avec impatience.
Pusieurs années pus tard, i ont construit un nouviau collège derrière el’rue Aristide Briand. J’sais pus in que année (j’vas vérifier su l’site ed’Fouquières conseillé par Bourdonb). J’as jamais vu l’intérieur mais cha avot l’air biau. Cha d’vot aussi êt’ plus caud in hiver ! Ché élèves, i ont dû incor’ mieux travailler !
Que cha m'a fait plaisir d'intindre parler d'min collège d'Fouquières et d'revoir les noms d'mes professeurs : Monsieur Bondoit en Anglais (Mister Goodfinger qu'in l'appelo) qui m'a fait aimer c't' langue là, Monsieur Bastin in Maths que j'ai arvu des années plus tard dins in village ed' vacances ou j'travaillo (j'avos 20ans) et qui m'avo arconnue, j'ai une photo de m'sixième dins ch' collège faudra que j'l'artrouve si ça s'trouve in éto au collège in même temps