l' lessife du lundi!

Annie, al dot êt' branchée sur min cerviau! Hier, en écrivant l'artique sur ch'carrieu d'carbon (1), j'ai aussi pinsé au lavache ed ché loques ed'fosse! Cha dot êt’ pasqu’in est d’anciens ed’Fouquières ! In a des souvenirs in commin !

L’lavache des loques ed’fosse, cha ma aussi rapp'lé l'lessife avant qu'in puisse acater eun’ machine à laver automatique: tout un programme!

El'lessife, m'mère, al le faisot el lundi. Pourquoi el lundi? Eh bin, j'in sais rin! P'têt qu'i y avot eun’ raison mais j'el connos point... I faudra que j’y d’minde. Mais l'lessife à l'maison, cha comminchot l'diminche: y avot l'blanc qui fallot faire bouillir! Donc, à partir du diminche après-midi, i y avot toudis l'bouleuse sur l'fu dins l'cuisine. L'lendemain, l'lundi donc, m'mère, al s'installot dins ce qu'in appelot ch'rabattue (un appentis) avec es'machine, ses baquets à rincer et es'essoreuse; al y passot s'matinée (in étot 7 à l'maison!), à tous ché saisons, qui faisot caud, frod,... qui pleuvot, neigeot, gélot,... Al n’avot, du courache ! J’as oublié dire que ch’rabattue, al étot derrière el’maison et i fallot carrier l’iau d’el cuisine (d’u qui y avo l’seul point d’iau (froite !) d’el maison) qui étot d’vant l’maison, traverser l’maison et arjointe ch’rabattue ! Vous veyez ché kilomètes qu’al faisot !

L'aut'souvenir, ch'est que quand j'rintros d'lécole à midi l'hiver, ech'linge, i étot accroché dins l'maison pour séquer. Cha sintot bon l'lessive! Quand i faisot biau, ch'linge, i étot bin sûr pindu dins ch'gardin. I volot au vint.Et ché lundis midi là, m'mère, al avot aussi trouvé l'temps faire à minger. Commint qu'al faisot donc? Quand t'es tiot, té t'in rinds même pas compte...

Quand in arpinse à tout cha, in peut que s’dire : « Vive l’machine à laver automatique ! ». Faire eun’ buée, achteure, cha n’a pus rien d’diffichile, surtout si t’as in plus un sèche-linge ! T’appuies sur ché boutons et ch’est parti ! L'progrès, cha peut aussi avoir du bon!