Les jardinsmin père, ses biêtes et ses camps!
par Hervé62155 le, 15/09/2006Y avot granmint d'mineurs qui él'votent des biêtes à leu maison. Min père, ch'étot l'champion d'l'élevage: sur eun'tiote surface au bout d'ech gardin, y avot un poulailler, un pigeonnier, des clapiers pour ché lapins!
Et dins ch'poulailler, in a eu ed'tout: des poules ed'toutes les sortes, des dindes, des faisans, des pintades,... Ch'étot sin grand passe-temps, avec sin gardin et ses camps qu'i louot dins Fouquières (i n'avot un derrière la mairie, et un aut' d'ù qu'y a achteure l'rocade minière intre Billy et Montigny, au bout de l'rue Molière.
Ch'est là qu'in allot aussi souvint couper de l'hierpe pour ché lapins.
Bien sûr, i'él'vot tous ché biêtes-là pour qu'in les minge. Et in in a mingées, des biêtes! Mi, j'avos tout l'temps d'mau à min coeur quand i tuot et dépiautot ché lapins: j'les veyos tout tiots, j'les veyos grandir tous les jours et un biau jour, vlan: coup du père François! Cha m'faisot pas parel pour ché volailles et ché pigeons... J'cros bin qu'li, min père, i préférot ses pigeons. Ché cha qu’i a gardé l’plus longtemps, d’ailleurs (No’ maison, al a jamais été rénovée et i a pu garder tous ses installations longtimps !). Mi, j’les avos ker avec des tiots pos, des tiots pos qu’i faisot pousser dins ché camps ! Pasque cha va d’soi qu’i faisot pousser ed’tout dins ses camps, jusqu’à du « koper » pour met’ dins ché cornichons au sel ! (J’in trouve pu achteure ; cha m’imbête ben !).
Ch’mineur, i avot p’têt pas toudis un gros salaire mais i savot nourrir s’famille ! Tant que s’femme et ses infants, i mingeotent bin, tout allot bin !
