Em première quatre chevaux (2)
par Ch'Zio le, 17/10/2006Ch'moteur d'el quatre chevaux i s'usot vite et, au bout ed trente mille km, i fallot faire ch'l'opération "coup de fouet", ch'est à dire canger ches pistons et ches qu'miches ed ches cylindres. Mais, malgré qu'j'avos fait faire ech coup d'fouet, chelle carette al m'a laissé un mauvais souvenir d'ches pyrénées, quères à Minloute.
In étant à Lourdes, in a voulu aller vir ches cols pyrénéens, rindus célèbres par ch'Tour de France. In a comminché par ch'col d'Aspin, particuliéremint raide.
Mais, rien à faire, même in première, chelle carette al n'a pas voulu l'monter et al a calé. Heureusemint ch'frein à main i étot in bon état et i avot pas gramint d'circulation et j'ai pu arriver à faire d'mi tour.
In 1954 in l'a cangée pour eine autre 4 ch. Renault i avot fait des progrés et al étot nettemint pu fiap et in'na étés plus contints. Mais que différinche avec el Clio 4 ch qu'ej vient d'acater !
L'photo mout' in départ in vagances avec el nouvelle carette, avec eine galerie d'toit bien garnie (ech coffre avant, occupé pas l'roue d'secours, faijot à peine cent litres). In r'marquera aussi ch'capot moteur el'vé à mi course par un support, c'qui permettot à ch'moteur d'et' miux arfrodi.
( 1 photos)