ch' pétit train d'Merlimont

j' me souviens y a bin eune vingtaine d années y avo un p'tit train qui roulo pindant l été à merlimont, un tchiot train sur roues qu in attindo impatiemment d' vant ch' drapeau au bout d' l av'nue d' la plache, in l intindo arriver au détour du dernier virache, avec l' musique d' accordéon qui sorto d' ses gros parleurs
li, ch' chauffeur i avo bin 70 ans , toudis eune clope au bec, et s' femme toudis bin habillée, l' mise en plis impéccape, assisse dinch' dernier wagon , avec l' malette d' sous et d' tickets in bindouliere sans oublier qu ale porto eune casquette blanque ed marin avec eune anque ed sul' devant
in monto dinch' wagon avec ché tchiots , eux i zétotent préssés equ' cha ch' mette in route, bon nous chéto les précautions d usache, pinche pas tin bras in dehors du wagon, reste assis, nan té cange pas d' place, nan t' soeur ale t a pas pinché té raconte des cacoules, nan t' glache teul' ming'ra eune fos qu in aura fait ch' tour, sinan té va t in mette partout, bref , l' quotidien quoi ......

cha y est ch' train i part, i print pas l' av'nue d' la plache, i sin va du coté du calvaire mais juste avint i tourne à gauche, in est dins ché rues d' merlimont oh pas les plus fréquentées, mais in vo , in arrivant aux carr'fours , ché boutiques qu ale font l' coin au niveau d' l av'nue d' la plache, cha y est in arriffe sul' grand plache du marché, là in tourne à gauche, in arriffe au coin , i a ch' garache, bon là in tourne à droite in print l av'nue d' la plache , et in passe ed vant l' mason d' mes parints qu in occupe tro s'maines l été
cha y est in passe edvant l'grotte sul'droite et in va tourner dinch' campingue qui est presque au niveau d' merlimont villache
là y a pas mal ed gins qui déchintent ou qui armontent , allez in r'part , in print l' grante av'nue , pi à un momint in tourne in coup à droite pi in print eune rue perpendiculaire, oh in espère passer d'vant l' mason d' mon monnonque, i fait cha un coup sur deux, cha y est i print l' bonne av'nue , l avenue adolphe leroy, tiens i est là , ché gosses et nouzautes in fait un grand coucou ....
cha y est in traverse, in passe d'vant ché viux terrains d' tennis sul' droite, pi plus loin ché les villas qu in conno ché noms par coeur, gai matin, caravelle, barcarolle, paimpol, chez mamy, oasis, interlute, pi cha y est in passe derriere l' eglisse, in continue tout dro , jusqu au front d' mer, in l' sint d ailleurs i a plus d' vint, cha y est , ché à nous à déboucher sur l esplanate et d' déchinte au niveau du poste ed secourisse d' merlimont plache, et cor faut s' dépécher pasqu i n a dja qui nous pass'rotent ed sus pour pouvoir s assire tout d' suite, j' dis cha in a fait l' meme cosse 30 mineutes avant
ché gosses i dissent te au r'voir ale dame du train ,mais tout d'suite , suit ta voie et perds pas l' nord, direction ch' marchand d' gauffes et d' glaches , et que que vous voulez les émotions cha creusse .....