ch' poulet ou ch' rosbeef
par minloute le, 22/11/2006chéto l' plat du diminche à presque tous les coups, cha fait qu achteure les p'tits pos , j' courre pas après .... mais chéto important l' repas du diminche pasque là , min père i interveno dinl' cuisine .....
chéto l' professeur barnartte du poulet
m' mère ale sorto l' plat du four, min père i avo mis s' serviette d'vant s' maronne pour pas l' tacher, oh cha arrivo quand meme qui a del sauce rebelle qu ale arrivo à s' foute sus' kémiche in avo dro à un grand "meeeertte" mais in éto habitué
comme pour ché grantes zopérations chirurgicales, m' mère , mère courache, ale avo du comme ché zinfirmières , préparer tout l attirale à l avinche, l' planche in bo pour découper, l' grante fourchette et ch' grand coutio , qu ' in s' demindo pourquo chéto chéto si grand sinan pour immerder sin monte, vu qu' min père i devo presque lever ché bras au d'sus des' tiete pour pouvoir s in servir, j a dis presque sinan zallez cor dire que minloute y exagère comme à chaque coup
pi l opération ale commincho, t avo pas interet à parler à min père ach' momint là sinon i t invoyo bouler à tous les coups
nan chéto trop important, et m' mère ale resto in r'trait prete à intervenir si i avo probleme, prete à intervenir, nan ché pas l' mot, interdit pour elle ed couper l' viante eune fo qu' min père i avo comminché, nan ale éto in r'trait pour intinte les réflexions d' min père
à part "meeerrtte" i pouvo y avoir aussi si l' bete as' rindo pas assez vite " té les za aiguisé ché ciseaux ?" et là si m' mère ale avo l' malheur ed poser eune question bete, ou plutot nan ché un pléonasme cha, l' femme ale pose toudis eune question idiote du ginre "pourquo cha coupe pas ?" chéto parti pour un tour, ché sur que si min père i li d'mindo d'puis quand i zavottent pas été aiguisés, cha voulo dire évidamint que cha coupo pas
alors là si l' bete ale éto coriace, so qu' m' mere ale avo acaté eune carne, ou alors chéto l' faute des ciseaux , d' toute facon pas del faute à min père
et l'pire qui pouvo arriver chéto qu in appuyant un coup sul' viante et in tirant in meme temps , l' morciau d' viante i valdingo à terre alors là in avo dro à "MMMMERRRRRTTTTTTE" et là , mi cor infant j' raviso l' dessin du fond deum' n assiete, un décor paysan du 18 ème sièque, j l a fait eune paire ed coups à raviser l' fond d'eum' n assiette que j' pourro cor vous décrire l' scène..