A Roméo, Ch Bruchet
par Marie-Claire le, 23/11/2006A Roméo
poésie de Charles Bruchet
Y’avot jamais été primé
A un’ quelconque exposition
I n’avot pas de pédigrée
Et Roméo chétot sin nom.
Iétot tout p’tit quand é j’l’ai eu
C’est d’l’usine que j’l’avos ramné
Aussitôt que mes gosses l’ont vu
M’famill’ grossit d’un' unité
Je m’rappelle cor el premièr’ fos
Que min p’tit tchien ia aboyé
Pour li, ch’étot ses premiers mots
Pour me transmettre é’s’namitié
Iétot tout noir et ondulé
Sauf un bout d’patte qui étot blanc;
Aussi, quand i’étot bien lavé
Cha li faisot comme un pas’ment.
Tout partout du qu’in a été,
Roméo iétot du voyache.
Dins’l’auto in étot serré
Mais Roméo iavot un’ plache.
Et si vous l’arotes vu courir
Sus les plages avec mes infants,
Nager, q’qu’fois à in mourir
Et s’essuyer in s’esbrouffant.
Car Roméo participot,
Conscient de tous nos faits et gestes,
Comprenot quand in s’amusot
Ch’étot un’ bête, pas un bébête !
Min tchien i n’étot pas méchant :
Beaucoup de bruit in aboyant,
Mais dès que vous étotes intrés,
I’d’mandot qu’à êtr’ caressé.
Mêm’ les moniaux dins s’n’écuelle
Vénotent parfois se délecter ;
Roméo s’caufot au solel
Et laissot faire les effrontés.
J’pourros vous in parler longtemps
Ch’est si facile lorsque ch’est vrai
Surtout qu’il a vécu quinze ans
Avant d’s’éteindre à tout jamais.
I’est là, à l’ombre du cerisier
Interré avec sin panier
Et les chants de tous les oiseaux
Bercent l’âme de Roméo
Certains porront in rigoler :
Nous, in a brait in l’interrant!
A chés gins là je répondrai :
''t’aim’ pas les bêtes, t’aim’ pas les gins''