Les jardinsun paquet d'chintes
par annie62110 le, 14/12/2006c'que j'vais vous raconter cha s'passot à Noël in 1954, mi l'5 janvier d'aprés j'auro huit ans et m'tiote soeur Jacqueline al aurot quatre ans au mos d'avril
al maison chétot réveillon, et arrivé eune certaine heure papa y nous z'a invoyées au lit, évidemment l'tiote al voulot pas y aller, alors papa y li a dit
"faut qu'te vas coucher, ou bin ch'Père Noël y pass'ra pas" al y a répondu in s'in allant
"j'sais bin que l'pére noel ché ti!!!"
in étot à peine couchées qu'al s'arléve et al ouvre el porte tout duch'mint
ch'sapin y'éto in face al voulot vire c'qu'y allo s'passer, seul'mint papa y l'a vue et al a eu eune féssée
au matin j'éto l'premiére levée, et y'avot sur mes pantoufles eune belle poupée "bella" avec eune robe in organdi rose, j'cro qu'ché l'plus biau cadeau d'Noël que j'ai eu
mais j'éto intriguée par l'paquet in papier craft qu'y avot sur les pantoufles de l'tiote al étot mal réveillée, et al s'posot les mêmes questions qu'mi, quand al a ouvert ch'paquet y'avo un pot d'moutarde et des chintes de l'cuisiniére, al faigeot eune tête al a méme pas brait mais al savot pu quoi dire, papa y li a dit
"t'a réussi l'Père Noël y t'a intindu hier, mi j's'ro d'ti j'y d'mindro pardon"
bin croyez me al a mis un momint a's'décider, al a fini par l'faire in brayant comme eune mad'leine
et la maman al a crié "Jacqu'line" al éto din not'chambre et y'avot eune belle poupée habillée in bleu din ch'lit al tiote
chétot m'n'histoire ed' Noël, à soixante ans j'l'ai toudis pas oubliée, ché un souv'nir cher à min coeur, un souv'nir ed tiote fille
