la pich'nette et le lancer d' coutiau

cha in i juo au fond del pature, bin loin d' ché parints, pasque chéto interdit d' ché interdit

yavo toudis un camarate qui avo un grand frère qui li avo prété sin coutiau , i nous ram'no cha comme si chéto un vrai trésor

nous in éto djà au fond del pature, et in l' voyo arrivé, avec des argards qui in dijotent longs, si i voulo donner eune allure discréte, chéto loin det' l' cas...

pi toudis s' main sus' poque, pour éviter qui a quéquosse qui qué d' là .............. nous in savo que chéto un coutiau

eune fo tous insempe , in allo dins zin coin, pour s' camucher , là i nous montro " l' objet du délit", i avo inv'loppé cha dans un grand mouchoir

chéto un opinel, i appelo cha un coutiau à cran d arret, ché sur qui yavo un cran d arret, mais chéto pas l' vrai coutiau d' malfrat ...

pour juer al' pich'nette, chéto simpe , fallo qu' t arriffe à lancer ch' coutiau entre les gampes d' un d' ceux qui juotent avec ti, l' miu chéto "d écarteler" ché à dire que pour récupérer un coutiau , fallo pas bouger un des pieds et y a des coups in devo s allonger pour essayer d' rattraper ch' coutiau

mais savez nous in éto pas trop malins, pasque nos parints souvint aussi i zavotent jués al' pich'nette, et savez , suffiso d' nous raviser au loin, à tro quate tout drot pas trop loin d l un d' l aute, à essayer d lancer ch' fameux coutiau

alors un coup y a l' père d un camarate qui nous zavo armarqué, li y arvéno du champ qui avo in bout del rue leverrier, et am' mote qui devo s' sin douter, i avo camuché s' brouette au milieu des rangées d' garache qui yavo au bout del rue

d' là au coin i nous zavo observé , et bin sur au bout d un momint qui a compris not' manége, i a appelé sin fils

mon diu , in a tous passé un mauvais quart d heure, min copain d abord pasque sin père i li a qué d' sus dès qui a arrivé à sin niveau

bin sur l aute y a d abord dit qu in juo pas al' pich'nette, pi aprés y a avoué , mais y a pas voulu dire qui qui avo ch' coutiau ...

nous dinch' fond, in avo fait un arplis stratégique, in éto passé par l' trou dech' mur in briques qui yavo au bout des camps ; in s éto camuché dins ch' verger

au bout d un momint in a rintré chez nous, j' diro pas la fleur au fusil, mais djà in prennant des tietes d innochints, in pinsant que cha suffiro pour pas s' faire imbeter

mais ch' père d' min camarate i avo porté l' pet à ché zautes parints, et in s a tous fait archevoir en rintrant

mais savez bien mal acquis ne profite jamais , chti qui avo ch' coutiau i s in a pris eune sacrée in rintrant as' mason

li y a pas eu d' chance, un aut' coup , in devo juer aux coboilles et aux zindiens, parel au bout del pature, du qu in avo "not' coin", chéto eune série d' ronciers qu in pouvo y pénétrer que par tro cotés, et in plus au miyeu , yavo eune tchiote butte avec des plantations bien drues d' sureau , et chéto pour nous un sacré poste d observation ..

bref min camarate , in l' vo arriver mais sans ses pistolets, in faijo djà la gueule, j éto prèt à li préter un des révolvers .. in plus i nous dit d abord qui avo rin ram'né et qui avo oublié ....

pi d un seul coup, sous nos ziux médusés et j' do dire impressionnés, i nous sort un coutiau mes gins, chéto un coutiau pour l' lancer

savez cha arsemblo à eune dague, et li i dijo qui s' ro l indien et que cha s' ro s' n arme

nous in éto pas trop contints pasque chéto dangereux...

ouais qui dit, mais zinquietez pas, j' va l'lancer que su ché zarpes

et in fait d arpes, in' n avo qu un chéto un cerisier , et là i décite d' nous faire eune démonstration ..

i lance ch' coutiau, et là tchac ...planté au miyeu du tronc , i arcomminche, devant nous, et là j' vous avoue qu in raviso pas vraimint du qui tiro ...

bin j' vous jure l' arme ale a r' bondi sur l arpe, et IMPOSSIPE à artrouver

aprés qu in s' so bin moqué des' guiffe, in l a aidé à cacher aprés, in rigolo in li dijo meme "j' l a trouvé" , "nan ché pas vrai" .... "té sait c' que j' viens d' trouver" "rin" ....

l aute in l' voyo canger, d' abord chéto un rire jaune, pi cha a fini par eune peur panique

fallo qui artrouffe ch' coutiau avant d' rintrer, pasque ch' coutiau , i l avo emprunté, mais sans l'dire ....... et i s' méfio d'el réaction d' sin frère quand qui r'marquero qui li manque ...

acoutez , j a meme artourné am' mason, j a été querre , et là parel j a emprunté mais sans l' dire, un gros aimant qui yavo such' bureau à min père

un gros aimant attaché à eune fichelle et in l a passé, passé , et arpassé ch' fameux aimant tout partout, in a arcomminché à tatonner ch' terrain des environs , mete par mete, rin ...

in l a jamais artrouvé ch' coutiau, et ché pas faute d avoir arcomminché à cacher ...meme des coups que pour min compte personnel, jamais in l a artrouvé

par conte min camarate y a mingé graffe, pasque sin frère y a artrouvé l' fameux étui mais vite, dans s' champe et là pour s' expliquer , fallo avoir d' l imagination.......