la table à manman

j a comminché à l' invers, j' vo que j a parlé dech' tiroir avant d' parler del tape del cuisine ,,,,,,,

ch' est dans l cuisine que s'trouvo la tchiote tape à manman, celle du que trono, au miyeu chte tchiote tape ,,,,

chte tchiote tape ale servo à tout, quand qui fallo éplucher ché légueumes, quand qui fallo équeutter ché zharicots, quand qui fallo préparer ch' repas ,,,,,

ah i n a eu des repas d' préparés su ch' te tape, d ailleurs l' revet'mint en plastique qui arcouvro un dessin , yavo d' zindrots du qui yavo fondu
j in su sur pasque mes soldats et mes cyclistes, j avo toutes les peines du monte à les faire tenir debout tous in plache ,,
mais j avo ker juer su ch'te tape quand qui faijo frod dehors, ah juer avec l' dos cauffé par ch' fourneau ,,,,
mais fallo savoir arplier ché gaules rapid'mint quand que manman ale dijo " hop et dasse" ou "caltez volaille" , pasque dans la minute al' allo poser d' sus d' quo préparer à minger ,,,,

ch'est l hiver que manman ale ralo par momints, quand qui faijo trop frod pour mette ch' linche dehors, et qui fallo l étente ,,,dans l' cuisine ,,,
ale arreto pas d' dire " ch'est pas pratique , mon diu qu' ch'est pas pratique" ,,,,,
alors là, manman ale préparo ché r'pas dans la salle à minger, en ayant soin d' mette plusieurs couches d' journal pour que l' toile cirée ale fonde pas ,,,,,,,
pi un jour, ch' progrès y a arrivé al' mason, oh pas d un coup ,mais cor rapid'mint ,,,,

un frigidaire, ouais j' peux dire un frigidaire vu que ch' éto bin l' nom du ,,,frigo ,,,,
pi peu d' temps après , un grand meupe en mélaminé blanc, qui par sa fonctionnalité, vinguette j imploye des mots du diminche, y a rimplaché ch' te tchiote tape
in y a gagné in plache dans l' cuisine, mais ch'est pas pour cha qu in l a j'té ,,,,,

nan , min père i avo toudis l' phrase magique prete , "cha peut toudis servir" ,,,,
ale a fini s' vie dans l anonymat , au fin fond d eune barraque à min père , arcouverte in partie d' cageots , qui pouvotent toudis servir ,,,,,,,,,,,,

à la fin hélas, ale a fini toute piquée qu' ale a servi d' refuges à insectes qui s' dijotent aussi "cha peut nous servir" ,,,,,